Għal dawk li jħobbu l-kafè, kif ukoll għal dawk li l-kejkijiet jippreferuhom inqas ħelwin, dan il-kejk huwa ideali. It-togħmiet tal-kafè u tal-kannella jikkumbinaw tajjeb ħafna flimkien.
Ingredjenti
- 140g butir mingħajr melħ, f’temperatura tal-kamra
- 140g zokkor fin (caster sugar)
- 3 bajdiet
- 140g dqiq self-raising, magħrbul
- 2 kuċċarini kafè (instant)
- Ftit ilma jaħraq
- ¼ kuċċarina trab tal-kannella
Għall-wiċċ
- 2 kuċċarini kafè (instant)
- 140g zokkor tal-ġelu (icing sugar)
- Ftit ilma jaħraq
- 100g butir mingħajr melħ, f’temperatura tal-kamra
- Trab tal-kannella, biex troxx
- Saħħan il-forn għal temperatura ta’ 180 Idlek 2 laned tondi ta’ 18ċm bi ftit butir imdewweb, u iksi l-qigħan bil-karta forn.
- Ħabbat il-butir u ftit ftit żid miegħu z-zokkor fin. Ħabbat sakemm it-taħlita tiċċara u teħfief.
- F’bieqja oħra ħabbat il-bajd u żidu mal-butir u z-zokkor filwaqt li tkompli tħabbat. Żid bl-istess mod id-dqiq u ħabbat sakemm jitħallat kollox.
- Ħoll il-kafè fi ftit ilma, ferrgħu fit-taħlita tal-kejk, żid ukoll it-trab tal-kannella u ħawwad. Aqsam it-taħlita bejn iż-żewġ laned.
- Aħmi għal 20-30 minuta, sakemm jogħla u stikka li ddaħħal fil-kejk toħroġ nadifa. Ħalli l-kejkijiet jibirdu fil-landa.
- Sadanittant ipprepara l-krema tal-kafè. F’bieqja ħabbat il-butir, u bil-mod żid iz-zokkor tal-ġelu filwaqt li tkompli tħabbat. Ħoll il-kafè fi ftit ilma jaħraq u ferrgħu mat-taħlita. Ħabbat kollox sew flimkien.
- Aqleb il-kejkijiet minn ġol-laned. Idlek il-wiċċ ta’ wieħed minnhom b’nofs il-krema u poġġi l-ieħor fuqu. Idlek il-kumplament tal-krema fuq il-wiċċ u għarbel ftit trab tal-kannella fuq kollox.
Ippruvajt din ir-riċetta? Kif sibtha? Għidilna billi tħalli kumment hawn taħt.
