Riċetta: Imqarrun fil-forn bil-bacon

Baked Ziti Casserole

Min ma jħobbux l-imqarrun fil-forn! Min qatt ma naqqar minn dawk il-biċċiet tal-wiċċ, xi ftit jew wisq iqarmċu! Hawn hi riċetta għall-imqarrun bil-bacon.

Ħin totali: siegħa

Ingredjenti:

  • Nofs kilo bacon, imqatta' zgħir
  • 3/8 kikkra xaħam tal-bacon li kont warrabt
  • 2 kikkri basal, imqatta'
  • Mgħarfa żejt Lesieur
  • Mgħarfa tewm, imqatta'
  • Mgħarfa ħwawar tal-cajun 
  • 5 imgħaref butir mhux mielaħ Kerrygold
  • Mgħarfa mustarda tal-ħabba sħiħa
  • 1 1/2 kikkri dqiq
  • Nofs kikkra inbid Sherry Cooking Wine      
  • 2.8 litri ħalib
  • Mgħarfa hot sauce
  • Mgħarfa Worcestershire sauce
  • Mgħarfa melħ, jew skont il-gosti
  • 1 1/2 kuċċarina bżar iswed, jew skont il-gosti
  • 3 kikkri ġobon Cheddar maħkuk 
  • 3 kikkri ġobon Żvizzeru maħkuk 
  • Nofs kilo mqarrun Agnesi 

 

Tħejjija:

Għalli l-ilma bi ftit melħ ġo borma kbira biex issajjar l-għaġin. Meta l-għaġin ikun irtab ftit, neħħih minn fuq in-nar, baħbħu bl-ilma kiesaħ u warrbu.

Sakemm l-għaġin ikun qiegħed isir, saħħan taġen zgħir fuq nar medju-għoli u aqli l-basal fiż-żejt sakemm jirtab u jismar. Warrbu.

Qatta' l-bacon biċċiet zgħar u sajjar sakemm isir iqarmeċ. Neħħi l-bacon minn ġo l-borma u żid il-butir max-xaħam tal-bacon li baqa' fil-borma. Baxxi n-nar u meta l-butir idub, żid it-tqiq u ħawwad għal madwar 3-5 minuti, sakemm it-taħlita tismar.

Żid il-ħwawar tal-Cajun, l-inbid, it-tewm u l-mustarda ġol-borma u ħawwad sakemm kollox jitħallat sew. Żid il-ħalib bil-mod filwaqt li qiegħed tħabbat it-taħlita b'ħabbata, sakemm kollox jitħallat sew. Baxxi n-nar għal medju-baxx u kompli ħawwad sakemm it-taħlita tal-ħalib issir ta' konsistenza kremuża. Oqgħod attenta biex ma taħraqx il-qiegħ tal-borma.

Żid il-ġobon kollu (minbarra kikkra mill-ġobon Żvizzeru) u kompli ħabbat it-taħlita sakemm kollox isir uniformi. Fl-aħħar żid il-basal ikkaramelizzat, il-Worcestershire sauce, il-hot sauce, u l-melħ u l-bżar skont it-togħma.

Ixgħel il-forn u saħħnu għal temperatura għolja fuq broil. Ħallat it-taħlita mal-għaġin u poġġi kollox ġo dixx tal-forn. Raxxax il-kumplament tal-ġobon fil-wiċċ u sajjar sakemm jismar. Żejjen bil-biċċiet tal-bacon.