Ingredjenti
Għal 2 ħobżiet żgħar
- 175g patata, imqaxxra u maqsuma min-nofs
- 1 mgħarfa żejt taż-żebbuġa extra-virgin
- ½ kuċċarina zokkor
- 2 mgħaref ilma fietel
- 1 ½ kuċċarina ħmira niexfa
- 1 ½ kikkra dqiq ismar (whole wheat)
- 1 mgħarfa klin (rosemary) frisk, imqatta’
- 1 mgħarfa sagħtar (thyme) frisk, imqatta’
- 1 kuċċarina salvja (sage) friska, imqattgħa
- 1 ¼ kuċċarina melħ
- 1½-1¾ kikkra dqiq
- Smid (semolina), biex troxx
Metodu
- Poġġi l-patata f’kazzola żgħira u għattiha bl-ilma. Poġġiha fuq in-nar u xħin tiftaħ tagħli baxxi n-nar u kompli tektek għal 15-20 minuta sakemm tirtab. Saffi u żomm kikkra mill-ilma. Poġġi l-patata f’bieqja, għaffiġha sew bil-furketta u roxxha biż-żejt. Ħalli l-patata u l-ilma jibirdu.
- Ħoll iz-zokkor fl-ilma fietel ġo bieqja, żid il-ħmira u ħallihom joqogħdu għal 5 minuti sakemm it-taħlita tiragħa. Żid il-patata u l-likwidu tat-tisjir, bil-mod daħħal id-dqiq ismar u ħabbat għal minuta. Daħħal il-ħxejjex aromatiċi u l-melħ fit-taħlita, imbagħad żid ftit ftit id-dqiq sakemm issir għaġina. Agħġen sakemm ikollok għaġina lixxa u elastika. Jekk ikun hemm bżonn żid ftit dqiq biex ma tibqax twaħħal.
- Poġġi l-għaġina f’bieqja midluka bi ftit żejt. Dawwar l-għaġina biex tiddellek biż-żejt u għatti b’sarvetta nadifa. Ħalliha f’post għas-sħana sakemm tirdoppja fid-daqs.
- Idlek tilar kbir biż-żejt u roxx bis-smid. Agħfas l-għaġina biex tinżel, tellagħha mill-bieqja u għaġinha ħafif. Aqsamha f’biċċtejn u fforma kull biċċa f’ballun. Poġġihom fuq it-tilar ’il bogħod minn xulxin u għattihom bis-sarvetta. Ħallihom jogħlew għal siegħa.
- Nofs siegħa qabel tibda taħmi saħħan il-forn għal temperatura ta’ 230°C. Poġġi dixx żgħir b’2 kikkri ilma fuq l-ixkaffa ta’ taħt tal-forn. Aħmi l-ħobż għal 20 minuta, baxxi t-temperatura għal 200°C u kompli aħmi għal 10-15-il minuta sakemm jiħmaru u meta ttaptap fuq il-qiegħ tagħhom jinstemgħu vojta. Poġġihom fuq gradilja biex jibirdu.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.