Riċetta: Cookies taz-zokkor

Sugar Cookies
  1. Riċetti tal-cookies issib ta’ kull kwalità u togħma; kollha irreżistibbli. Dawn il-cookies b’togħma ta’ vanilla u menta xejn anqas.

    Ingredjenti

    • 3 kikkri dqiq
    • 2 kuċċarini trab tal-ħami (baking powder)
    • ¾ kuċċarina melħ
    • 1 kikkra butir mingħajr melħ, artab
    • 1 kikkra zokkor fin (caster sugar)
    • 2 mgħaref krema doppja
    • 1½ kuċċarina essenza tal-vanilla
    • ½ kuċċarina essenza tal-menta
    • 2 bajdiet
    • ¼ kikkra zokkor tal-ġelu (icing sugar), biex troxx
    • ¼ kikkra dqiq, biex troxx

     

    1. Poġġi l-ixkaffa tal-forn fil-pożizzjoni tan-nofs. Saħħan il-forn għal temperatura ta’ 175°C. Iksi żewġ tilari bil-karta forn.
    2. F’bieqja ħawwad sewwa flimkien id-dqiq, it-trab tal-ħami u l-melħ.
    3. F’bieqja kbira ħabbat bil-magna l-butir, iz-zokkor, il-krema, u l-essenzi tal-vanilla u l-menta għal madwar żewġ minuti.
    4. Żid il-bajd waħda waħda u ħabbathom bil-mod sakemm jidħlu fit-taħlita. B’mgħarfa tal-metall daħħal bil-mod (fold-in) l-ingredjenti xotti fit-taħlita tal-butir.
    5. Aqsam l-għaġina fi tnejn u fforma kull waħda f’ballun ċatt. Geżwirhom fil-cling film u poġġihom fil-friġġ għal siegħa.
    6. Ħallat flimkien il-¼ kikkra dqiq u l-¼ kikkra zokkor tal-ġelu. B’din roxx il-wiċċ li ser taħdem fuqu.
    7. Iftaħ waħda mill-biċċiet tal-għaġina għal ħxuna ta’ 0.3ċm. Aqta’ ċriki (bil-biscuit cutters) u poġġihom fit-tilari, bi ftit spazju bejn waħda u oħra.
    8. Iġbor il-fdalijiet tal-għaġina , għaqqadhom, erġa’ geżwirhom fil-cling film u poġġihom fil-friġġ. Kompli aqta’ l-cookies mit-tieni biċċa tal-għaġina u poġġi fuq it-tilar. Uża wkoll il-fdalijiet li tkun kessaħt fil-friġġ.
    9. Għall-aħjar riżultat daħħal it-tilari fil-forn wieħed wieħed u aħmi għal 10 minuti. Berred il-cookies fuq gradilja. Żejjen u aħżen f’kontenitur tal-plastik jew landa.