Din hija l-ewwel minn sensiela ta’ ħames riċetti għal matul il-ġimgħa. Biex tippjana u tagħmel ix-xirja sib l-erbgħa li jmiss. Ir-riċetta tat-Tnejn hija soppa tat-tadam, u ħobż mixwi bil-ġobon u l-bacon. Tista’ tagħmel kwantità doppja ta’ soppa, mingħajr ma żżid il-krema, u tiffriżaha għal 3 xhur, imbagħad iżżid il-krema meta twaqqa’ l-friża. Biex is-soppa tiġi lixxa u kremuża mingħajr ma żżid ħafna krema, itħanha tajjeb bil-blender.
Preparazzjoni: 35 minuta
Ħin totali: 45 minuta
Isservi: 4 persuni
Ingredjenti
- 1 mgħarfa żejt taż-żebbuġa ekstra verġni
- 1 basla kbira ħamra, imqattgħa
- 1 sinna tewm, imqattgħa
- Melħ oħxon u bżar mitħun frisk
- 3 tadamiet kbar ( madwar 900g b’kollox), mingħajr żerriegħa u mqattgħin
- 1 kikkra brodu tal-ħaxix jew tat-tiġieġa
- ¼ kikkra krema doppja
- 6 listi bacon
- 2 mgħaref butir, temperatura tal-kamra
- 8 biċċiet ħobż tal-Franċiż
- 1 kikkra ġobon Gruyere, maħkuk oħxon
Metodu
- Saħħan iż-żejt f’kazzola kbira fuq nar medju.
- Żid il-basla u t-tewma, melħ u bżar. Ħawwad għal 4-6 minuti sakemm tirtab il-basla.
- Żid it-tadam u għolli ftit in-nar. Ħawwad għal 4-6 minuti sakemm it-tadam jibda jinħall.
- Żid il-brodu u kikkra ilma. Meta jagħli baxxi n-nar u tektek għal 10 minuti.
- Itħan it-taħlita bil-blender u erġa’ saħħan is-soppa għal minuta. Żid il-krema u melħ u bżar. Neħħi minn fuq in-nar u għatti l-kazzola biex is-soppa tibqa’ sħuna.
- Saħħan taġen kbir fuq nar medju u sajjar il-bacon sakemm jiħmar ftit miż-żewġ naħat. Poġġi l-bacon fuq karti tal-kċina biex tassorbi x-xaħam. Neħħi xi xaħam li jibqa’ fit-taġen.
- Idlek naħa waħda tal-biċċiet tal-ħobż bil-butir. Poġġi biċċiet tal-bacon u ġobon fuq il-wiċċ ta’ mingħajr butir ta’ erbgħa minnhom, u iksi bl-erba’ biċċiet ħobż li jkun fadal, in-naħa midluka ’l fuq.
- Ixwi l-ħobż ftit ftit fit-taġen fuq nar medju għal baxx sakemm il-ħobż jiħmar u l-ġobon jinħall.
- Aqsam kull parti f’erbgħa u servi mas-soppa.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.