Riċetta: Bexamella

Riċetta Bexamella

Din iz-zalza kremuża Franċiża tintuża f’ħafna riċetti, bħall-imqarrun bil-ġobon. Hija zalza sempliċi magħmula minn butir, ħalib, dqiq u melħ, u kultant  bi ftit togħma ta’ basal ukoll.

 

Ħin: 30 minuta

Ingredjenti

Għal 4 kikkri

  • 3 mgħaref butir mingħajr melħ
  • ¼ kikkra dqiq
  • ¼ kikkra basal, imqatta’ fin
  • ½ kuċċarina melħ oħxon
  • 4 kikkri ħalib
  1. Ħoll il-butir f’kazzola fuq nar medju.
  2. Żid il-basal u tektek għal madwar 6 minuti sakemm jirtab.
  3. Żid id-dqiq u l-melħ u kompli ħawwad għal madwar 5 minuti, sakemm it-taħlita tieħu kulur dehbi ċar u minnha tibda ħierġa riħa tfuħ.
  4. Ferra’ 2 kikkri ħalib filwaqt li tkompli tħabbat b’ħabbata tal-bajd sakemm it-taħlita tiġi lixxa mingħajr boċċi.
  5. Kompli ħawwad u għaddi l-imgħarfa minn mal-qiegħ tal-kazzola biex it-taħlita ma teħilx.
  6. Kif tibda tagħli baxxi n-nar u ħalliha ttektek sakemm tibda tagħqad filwaqt li tħawwad sikwit, madwar 10 minuti. Iz-zalza tkun lesta meta togħrok ammont żgħir bejn subgħajk u ma tinħassx ramlija.

Biex terfa’

  • Għatti l-wiċċ tal-kazzola bil-cling film u ħalliha tibred.
  • Poġġi l-bexamella f’kontenitur li jingħalaq sew u poġġiha fil-friġġ fejn tista’ żżommha sa 5 ijiem.

 

Ippruvajt din ir-riċetta?  Kif sibtha? Għidilna billi tħalli kumment hawn taħt.