Riċetta: Insalata tax-xgħir bit-tuffieħ, lewż u mozzarella affumikata

Ix-xgħir (barley) huwa sors naturali ta' fibra u ta' diversi vitamini u minerali li jagħmluh ikel bnin u tajjeb ħafna għas-saħħa. Hemm evidenza li x-xgħir mhux biss jipproteġi l-intestini u r-regolarità, iżda wkoll irażżan il-kolesterol, inaqqas ir-riskju ta' mard tal-qalb u jipprevjeni l-kanċer tas-sider, speċjalment fin-nisa wara l-menopawża. Hemm evidenza wkoll li x-xgħir inaqqas ir-riskju tad-dijabete tat-tip 2, u jrażżan l-iżvilupp tal-ażżma fit-tfal. Barra minn hekk ix-xgħir jgħin lil dawk li jbatu bl-artrite jew bil-ġebla.

Ipprova din ir-riċetta għal insalata tax-xgħir bit-tuffieħ, lewż u mozzarella affumikata.

Isservi: 4 persuni
Preparazjoni: 30 min
Ħin totali: 60 min

Ingredjenti:

Għat-tewm mixwi fl-inbid:

  • 10 sinniet tewm
  • Mgħarfa għasel
  • Ftit inbid abjad

Għall-insalata:

  • Kikkra xgħir (barley)
  • Kuċċarina melħ
  • ½ kikkra lewż ibblanċjat (klikkja hawn ħa tara kif tibblanċja l-ingredjenti)
  • 2 tuffieħat
  • Meraq ta’ lumija
  • Kikkra żbib
  • ¼ ta’ kikkra tursin frisk
  • 170g mozzarella affumikata, mqatta' f’biċċiet żgħar
  • 1/3 ta’ kikkra żejt taż-żebbuġa
  • 2 ½ imgħaref ħall balsamiku
  • Bżar u melħ

 

Tħejjija:

Għat-tewm mixwi fl-inbid:

Saħħan il-forn għal 180 C

Poġġi s-sinniet tat-tewm fin-nofs ta' biċċa fojl 30cm x 30cm.

Iksihom bl-inbid u l-għasel.

Itwi l-fojl biex tagħmel pakkett.

Poġġi l-pakkett ġo dixx u itfa’ d-dixx fil-forn.sakemm jirtab it-tewm, għal xi 45 minuta.

Itfi l-forn u ħalli kollox jibred.

Għaffeġ it-tewm sabiex joħroġ minn ġol-qoxra u itfa’ fil-ġenb.

 

Għall-insalata tax-xgħir:

Waqt li t-tewm qiegħed isir fil-forn, itfa’ x-xgħir, melħ u sitt tazzi ilma ġo kazzola.

Saħħan fuq nar għoli sakemm jibda jbaqbaq, imbgħad baxxi n-nar u ħallih itektek, mikxuf, sakemm isir, għal madwar 25 minuta.

Meta jkun sar, neħħi l-ilma u ħallih jixxotta għal 10 minuti fuq tilar miksi bil-karta tal-kċina.

Neħħi l-qalba tat-tuffieħ, qattgħu f'biċċiet żgħar u ixħtu mill-ewwel ġo skutella bil-meraq tal-lumi u ftit ilma sakemm tiksih.

Ġo skutella ikbar ħawwad iż-żejt u l-ħall.

Itfa’ l-lewż ġo taġen u ixwih fuq nar medju billi tħawdu kultant.

Itfa' l-lewż ġo l-iskutella max-xgħir, iż-żbib, it-tursin, il-mozzarella u t-tewm.

Neħħi t-tuffieħ minn ġol-meraq u żidu mat-taħlita.

Ħawwad sew u żid il-bżar u l-melħ għat-togħma.

 

Jekk tixtieq verzjoni oħra ta' insalta bix-xgħir bit-tiġieġ u l-qamħirrun, ara dan il-filmat miġjub minn Everyday Food by Sarah Carey. 

 

Biex tesperimenta b'aktar riċetti fantażjużi bit-tuffieħ, ikklikkja hawn: Riċetti interessanti bit-tuffieħ għall-ħarifa.