M’hemm xejn aktar sodisfaċenti milli f’xi lejl kiesaħ tax-xitwa tipprepara din it-torta sħuna b’għatu jqarmeċ ta’ għaġina sfirjulata. U biex timla aktar serviha ma’ patata maxx kremuża.
Preparazzjoni: 45 minuta
Ħin: 30 minuta
Ingredjenti
Għal 4-6 persuni
- 1 mgħarfa żejt veġetali
- 8 koxox tat-tiġieġ, mingħajr għadam u ġilda
- 8 listi bacon taż-żaqq, imqatta’ biċċiet kbar
- 1 basla, maqsuma min-nofs u mqattgħa għat-tul
- 250g faqqiegħ (mushrooms) żgħar
- Qabda friegħi tas-sagħtar (thyme)
- 2 mgħaref dqiq
- 400ml stokk tat-tiġieġ
- 200ml ħalib
- 500g għaġina sfirjulata mixtrija lesta
- 1 bajda, imħabbta
- Melħ u bżar mitħun frisk
Metodu
- Saħħan iż-żejt f’taġen kbir.
- Roxx it-tiġieġ bil-melħ u bżar u aqli għal 5-8 minuti sakemm jiħmaru minn kull naħa. Jista’ jkollok bżonn li taqlihom f’darbtejn, jiddepedi mid-daqs tat-taġen.
- Tella’ t-tiġieġ fuq platt u itfa’ l-bacon fit-taġen. Aqli għal 5 minuti sakemm jiħmar.
- Żid il-basla, il-faqqiegħ (mushrooms) u s-sagħtar (thyme), u aqli fuq nar għoli għal 3 minuti sakemm il-basal jieħu l-kulur. Żid id-dqiq u ħawwad għal minuta.
- Neħħi minn fuq in-nar u żid, filwaqt li tħawwad, l-istokk, imbagħad il-ħalib. Erġa’ poġġi t-tiġieġ fit-taġen u tektek għal 30 minuta.
- Poġġi t-taħlita f’turtiera bix-xoffa u ħalliha tiksaħ.
- Saħħan il-forn għal temperatura ta’ 220°C.
- Roxx id-dqiq fuq il-wiċċ li qed taħdem fuqu u iftaħ l-għaġina għal ħxuna ta’ 4mm.
- Mill-għaġina aqta’ strixxa twila u, bi ftit bajda mħabbta, waħħalha mad-dawra tad-dixx.
- Idlek l-istrixxa bil-bajda. Bil-għajnina tal-lembuba tella’ l-kumplament tal-għaġina fuq it-torta. Agħfas it-truf b’subgħajk u aqta’ barra ż-żejjed b’sikkina taqta’. Idlek il-wiċċ tal-għaġina bil-bajda u aħmi għal 30 minuta, jew sakemm l-għaġina tiħmar sew u tintnefaħ.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
