Jekk matul ħajtek it-tisjir tiegħek ikkonsista biss f'li tiftaħ bott 'l hemm u pakkett 'l hawn jew li ssaħħan l-ikel fil-microwave, m'għandekx għalfejn tibqa' hekk. M'huwiex tant diffiċli li titgħallem issajjar mill-ġdid u kull m'għandek bżonn huma ftit riċetti tajbin u sempliċi biex jagħtuk spunt. Ladarba tibda, żgur li tibqa' għaddej. Ħu dawn il-pariri biex tibda:

• Ixtri ktieb tal-kċina. Tista' tfittex wieħed apposta għal min għadu jibda biex tidra t-terminoloġija u l-metodi bażiċi tat-tisjir.

• Fittex blogs ta' nies li jħobbu jsajru ikel li jogħġbok u agħmel subscribe. Dawn ta' spiss jaqsmu l-esperjenzi tagħhom fil-kċina u tista' titgħallem ħafna minnhom.

• Segwi programmi tat-tisjir fuq it-televiżjoni. Hawn bosta programmi kemm bil-Malti kif ukoll bl-Ingliż. Meta tara l-metodi b'għajnejk titgħallem iktar malajr.

• Tkellem man-nies. Tiskanta kemm issib min iħobb isajjar u li titkellem huwa mod tassew soċjali u interessanti kif tista' tieħu ideat tajbin. Tiddejjaqx tistaqsi.

• Tgħallem uża l-għodda. Is-sikkina taf tkun l-akbar ħabiba tiegħek. Ara xi video fuq YouTube kif għandek tuża l-għodda kif suppost.

• Uża dan is-sit biex issib riċetti tajbin. Ħu ħsieb li tibda b'riċetti ħfief biex ma taqtax qalbek.

• Ħares lejn il-kummenti. Ħafna siti tat-tisjir jipprovdu din il-faċilità, u li taqra l-kummenti ta' min diġà pprova r-riċetti jaf jagħtik spunt ieħor.

• Ibda sajjar. Toqgħodx tistenna li tħossok lest mit-tagħlim. Ma jimpurtax jekk ma jirnexxilekx - l-esperjenza hija l-akbar għalliema.

• Ibda b'ingredjenti rħas; b'hekk jekk ir-riċetta ma tirnexxilekx ma tkunx tlift ħafna flus.

• Ibda b'riċetti ta' malajr; b'hekk ma teħilx mal-cooker għal siegħat twal u forsi tiddejjaq.

• Toqgħodx tinkwieta fuq id-dehra tal-ikel. Fil-bidu ikkonċentra fuq it-togħma.

• Duq l-ikel. Tibda tidra mit-togħma fejn mort żmerċ kif ukoll x'għandek iżżid jew tnaqqas biex l-ikel jitjieb.

• Itlob parir. Qabbad lill-ħbieb jew lill-familja jduqulek l-ikel li sajjart u itlobhom l-opinjoni onesta tagħhom.

• Irranġa l-iżbalji. Sakemm ma ħraqtx l-ikel, kważi dejjem tista' tirranġa l-iżbalji. Hemm metodi ta' kif tista' tirranġa l-konsistenza tal-ikel, tnaqqas il-melħ jew tbiddel ir-riċetta kompletament biex tgħatti falliment mingħajr ma ħadd jinduna!

• Teħilx mal-stess riċetti. Ibqa' esperimenta b'riċetti ġodda - iktar ma ssajjar iktar tidra.

• Taqtax qalbek. Kun kunfidenti u tibżax tiżbalja.

• Tgħaġġilx. Tgħażilx riċetti li jkollhom ingredjenti strambi, iqumu ħafna flus, ikunu twal ħafna, jew forsi jkunu diffiċli wisq. Agħti ċans lilek innifsek li tidra u trabbi l-kunfidenza qabel ma tagħmel pass ieħor.

Hemm min jemmen li l-emozjonijiet jidħlu fl-ikel, mela sajjar bil-qalb, mhux meta tkun irrabjat jew maħruq, u sajjar bit-tbissima fuq wiċċek. :)