Għalkemm din ir-riċetta tieħu ftit tal-ħin biex tipprparaha, ir-riżultat ikun wieħed sodisfaċenti żgur. Il-weraq il-kbar tal-kaboċċa huma l-aħjar li tuża. Il-mili huwa taħlita ta’ quinoa, laħam tad-dundajan li jkun fadal mill-ikla tal-Milied, imħawrin bl-allspice u kannella biex jagħtu togħma kemxejn ħelwa. Għall-istess riċetta tista’ tuża ross minflok quinoa. Dawn il-weraq mimlijin tista’ tippreparahom minn qabel u jżommu fil-friġġ sa erbat ijiem.
Ingredjenti
Għal 12-il werqa mimlija li jservu 6 persuni
- 12-il werqa tal-kaboċċa kbar
- Melħ
- 60ml żejt taż-żebbuġa ekstra verġni
- 1 basla, imqattgħa rqiq
- 3 sinniet tewm, imqattgħin irqiq
- 400g polpa tat-tadam
- 1 kuċċarina zokkor
- 30-40 żbiba (jekk trid)
- ½ kuċċarina trab tal-kannella
- ¼ kuċċarina allspice, mitħun frisk
- 1 ½ kikkra quinoa misjura
- ½-¾ kikkra laħam tad-dundjan, imqatta’ rqiq
- ¼ kikkra tursin frisk, imqatta’
- 3 mgħaref nagħniegħ frisk, imqatta’
- Bżar mitħun frisk
- ½-1 kikkra ilma, skont il-bżonn
- Meraq ta’ lumija kbira
- 1 mgħarfa kunserva
Metodu
- Imla bieqja bl-ilma kiesaħ. Għalli borma kbira mimlija bl-ilma. Neħħi kemm tista’ miz-zokk oħxon tal-weraq mingħajr ma tqatta’ l-werqa.
- Meta jagħli l-ilma żidu l-melħ u itfa’ l-weraq tal-kaboċċi ftit ftit. Għalli kull tefgħa għal 2 minuti u ttrasferihom għall-bieqja bl-ilma kiesaħ. Saffi u agħfas il-weraq bil-mod biex joħroġ l-ilma żejjed u mbagħad poġġihom fuq karti tal-kċina biex joqtru.
- Saħħan 2 mgħaref żejt f’taġen kbir fuq nar medju, u żid il-basla. Qalli għal 5 minuti sakemm tirtab.
- Żid it-tewm u niskata melħ u ħawwad għal madwar minuta.
- Żid it-tadam, zokkor, żbib, kannella, allspice u melħ. Kompli ħawwad għal 10-15-il minuta sakemm it-tadam jinxtorob u z-zalza tibda tfuħ. Neħħi t-taġen minn fuq in-nar.
- F’bieqja kbira ħallat flimkien il-quinoa, id-dundjan, in-nagħniegħ u t-tursin. Żid it-taħlita tat-tadam u ħallat flimkien. Żid magħhom ftit melħ u bżar.
- Idlek biż-żejt taġen fond bil-għatu, jew kazzola.
- Biex timla l-weraq: poġġi werqa fuq il-wiċċ li qed taħdem fuqu, bin-naħa tal-vina ’l fuq u z-zokk in-naħa tiegħek. Jekk il-werqa tkun miftuħa minn fejn neħħejt iz-zokk aktar qabel, iġbed iż-żewġ naħat flimkien biex tagħlaq il-vojt.
- Poġġi żewġ mgħaref lixxi mit-taħlita fin-nofs tan-naħa t’isfel tal-werqa u ħalli 2ċm mit-tarf. Itwi t-tarf tal-werqa ’l fuq biex tagħlaq, ilwi l-ġnub ’il ġewwa u obrom issikkat filwaqt li ddeffes il-ġnub ’il ġewwa sew.
- Poġġi bit-tarf tal-werqa wiċċha ’l isfel fuq it-taġen u poġġi kull werqa mimlija ssikkata mal-oħra. Roxx b’2 mgħaref żejt taż-żebbuġa.
- Ħabbat flimkien ½ kikkra ilma, il-kunserva u l-meraq tal-lumija. Żid ftit melħ u ferra’ fuq il-weraq mimli biex tgħattihom bl-eżatt. Jekk ma jitgħattewx żid ftit ieħor ilma.
- Għatti l-weraq b’biċċa kartaforn u poġġi platt fuq il-karta bħala piż.
- Poġġi fuq in-nar u meta jagħli baxxi n-nar biex tħalli l-weraq itektku għal 30-45 minuta sakemm jirtabu.
- Neħħi minn fuq in-nar u bil-mod tella’ l-weraq mimlijin b’mgħarfa mtaqqba.
- Servihom sħan jew kesħin biz-zalza fuqhom.
