Riċetta veġetarjana: Torri tat-tadam, brunġiel u mozzarella friska

grilled aubergine,tomato and mozzarella

Platt ikkulurit u appetituż li tista’ sservi bħala ikla ħafifa, jekk trid ma’ ħobż frisk, jew bħala l-ewwel platt.

Ħin: 40 minuta

Isservi: 4 persuni

Ingredjenti:

  • 100 ml żejt taż-żebbuġa
  • 2 mgħaref ħabaq frisk, imqatta’
  • mgħarfa nagħniegħ frisk, imqatta’
  • kuċċarina qxur tal-lumi, maħkuk
  • 4 tadamiet kbar miċ-ċatt tal-flieli, imqattgħin fi 12-il rota ta’ 5 mm ħxuna
  • Brunġiela mdaqqsa jew tnejn iżgħar, imqattgħa fi 12-il roti ta’ 5mm ħxuna
  • 3 blalen mozzarella friska tal-buflu (jew mozzarella normali mill-friska, tal-ilma), imqattgħin fi 12-il rota b’kollox
  • melħ u bżar mitħun frisk
  • weraq tal-ħabaq jew nagħniegħ frisk, biex iżżejjen

 

Tħejjija: 

  1. Fi skutella ħallat flimkien iż-żejt taż-żebbuġa, il-lumi, il-ħabaq u n-nagħniegħ, bżar u melħ.
  2. Idlek ir-roti tat-tadam u l-brunġiel bit-taħlita u poġġi r-roti tal-mozzarella fil-kumplament tat-taħlita li jibqa’ fl-iskutella biex jimmarinaw.
  3. Saħħan grilja u ixwi l-brunġiel għal 2-3 minuti miż-żewġ naħa sakemm jiħmaru ftit.
  4. Poġġi rota tadam fuq kull platt (4). Fuq kull rota tat-tadam poġġi rota brunġiel u rota mozzarella. Kompli s-saffi b’dan il-mod sakemm tispiċċa b’saff tadam. Roxx fuqhom il-kumplament tat-taħlita taż-żejt li jkun fadal.
  5. Servi l-platt imżejjen bil-weraq tal-ħabaq jew nagħniegħ frisk.

Ippruvajtha din ir-ricetta ta' torri tat-tadam, brunġiel u mozzarella friska? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.