It-tadam tas-sajf ikun tant bnin li ftit li xejt għandu bżonn ingredjenti oħra miegħu. Dan il-platt ross huwa sempliċi għall-aħħar għax it-togħmiet tat-tadam u ġobon feta flimkien mal-ħabaq huma biżżejjed għal mar-ross.
Ħin: 40 minuta
Isservi: 4 persuni
Ingredjenti:
- 300 g ross arborio jew short grain
- Litru stokk tal-ħaxix, jaħraq
- Basla kbira, imqattgħa rqiq
- 4 sinniet tewm, imqattgħin
- 6 tadamiet, imqaxxrin u mqattgħin
- 150 g ġobon feta
- 150 ml inbid abjad
- 2 mgħaref żejt taż-żebbuġa
- Melħ u bżar mitħun frisk
- Mgħarfa butir
- 2 mgħaref ħabaq frisk, imqatta’; u weraq sħiħ biex iżżejjen
Tħejjija:
- F’taġen kbir saħħan iż-żejt taż-żebbuġa fuq nar moderat u żid il-basla u t-tewm. Qalli sakemm jirtabu, żid ir-ross u ħawwad sakemm jinkesa. Ferra’ l-inbid u ħawwad sakemm jinxtorob, imbagħad żid it-tadam u, kif it-taħlita tibda tagħqad, żid l-istokk kuċċarun kull darba u ħallih jinxtorob filwaqt li tkompli tħawwad. Jista’ jkun li ma jkollokx bżonn l-istokk kollu biex isir ir-ross.
- Żid il-butir, il-ħabaq, 100 g mill-ġobon feta, u roxx bil-melħ u bżar, u ħawwad kollox sew sakemm jinħallu l-butir u l-ġobon.
- Qassam fil-platti u farrak ftit aktar feta fuq kull plat. Żejjen bil-weraq tal-ħabaq u servi.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
