Riċetta veġetarjana: Ravjul tal-ġbejniet u rkotta b’zalza tal-brunġiel

Cottage cheese ravioli

Ir-ravjul jirrikjedi ftit ħin u paċenzja mhux ħażin biex tagħmlu, imma r-riżultat ikun tajjeb u ta’ sodisfazzjon ukoll. Jekk m’għandekx ħin tibda din ir-riċetta mill-bidu u tagħmel ir-ravjul int, tista’ tuża ravjul mixtri lest u sservih b’din iz-zalza.

Ħin: siegħa u 50 minuta

Isservi: 4 persuni

Ingredjenti:

Għall-għaġina:

  • 400 g dqiq
  • 4 bajdiet, imħabbtin ħafif

Għall-mili:

  • 250 g ġbejniet friski
  • 250 g irkotta
  • Mgħarfa tursin frisk, imqatta’ rqiq
  • Melħ u bżar mitħun frisk

Għaz-zalza:

  • Brunġiela kbira, jew tnejn żgħar, imqaxxrin u mqattgħin
  • Mgħarfa kunserva
  • 400 g polpa tat-tadam; jew 6 tadamiet misjurin, imqaxxrin u mqattgħin
  • 4 sinniet tewm, imqattgħin
  • 2 mgħaref żejt taż-żebbuġa
  • 100 ml inbid abjad
  • Kuċċarina zokkor
  • Ponn weraq tal-ħabaq frisk, imqatta’
  • Melħ u bżar mitħun frisk
  • Ġobon Parmiġġan, biex isservi

 

Tħejjija:

  1. Poġġi l-ġbejniet u l-irkotta f’passatur biex joqtru u jneħħu l-likwidu żejjed.
  2. Għarbel id-dqiq fi skutella kbira u agħmel ħofra fin-nofs tiegħu. Ferra’ l-bajd u għaqqad f’għaġina sakemm tiġi lixxa u tiġġebbed. Geżwer l-għaġina f’borża u poġġiha fill-friġġ.
  3. Sadanittant ipprepara z-zalza u l-mili. Poġġi l-brunġiel f’passatur, roxxu sewwa bil-melħ u ħallih joqtor.
  4. Għaffeġ flimkien il-ġbejniet u l-irkotta, żid ftit bżar mitħun frisk u t-tursin u ħawwad.
  5. Laħlaħ il-brungiel sew bl-ilma u qattru sew.
  6. Saħħan iż-żejt f’taġen u qalli t-tewm għal ftit sekondi, imbagħad itfa’ l-brunġiel, ħawwad u żid l-inbid, u kompli ħawwad sakemm il-brunġiel jibda jirtab. Żid il-kunserva, il-polpa jew tadam imqatta’, u z-zokkor, melħ u bżar. Meta z-zalza tiftaħ tagħli baxxi n-nar, għatti t-taġen parzjalment, u tektek għal 20-25 minuta jew sakemm tara li z-zalza nġibdet. Żid il-ħabaq, ħawwad u għaffeġ iz-zalza b’mgħarfa tal-injam jew masher.
  7. Sakemm tkun qed ittektek iz-zalza agħmel ir-ravjul. Poġġi borma kbira ilma bil-melħ fuq in-nar. Iftaħ l-għaġina rqiq għat-tul. Poġġi nofs kuċċarina mili kull 6 ċm fuq tarf wieħed. B’pinżell idlek ftit ilma bejn mili u ieħor u t-truf tal-għaġina u itwi t-tarf il-vojt fuq il-mili. Agħfas it-truf u bejn il-mili sew flimkien u aqta’ f’forom tondi jew kwadri. Għaqqad l-għaġina żejda u erġa’ għamel ravjul sakemm jispiċaw l-għaġina u l-mili.
  8. Għalli r-ravjul fl-ilma jagħli għal ftit minuti; normalment ikunu saru meta jitilgħu fil-wiċċ tal-ilma. Saffi sewwa r-ravjul.
  9. Servi r-ravjul biz-zalza tal-brunġiel u ġobon Parmiġġan imferrex fil-wiċċ.

Ippruvajtha din ir-ricetta ta' ravjul tal-ġbejniet u rkotta b’zalza tal-brunġiel? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.