Din ir-riċetta tixbah ħafna l-mod kif nagħmlu r-risotto, imma minflok ross hemm il-quinoa – żerriegħa għanja fil-proteini u nutrijenti oħra u meqjusa bħala super food.
Ħin: 35 minuta
Isservi: 4 persuni
Ingredjenti:
- 400 g quinoa
- Litru stokk tat-tiġieġ jew tal-ħaxix, jaħraq
- 200 g faqqiegħ abjad, imnaddaf u mqatta’
- 200 g faqqiegh kannella (cremini), imnaddaf u mqatta’
- 2 mgħaref żejt taż-żebbuġa
- Basla kbira, imqattgħa rqiq
- 4 sinniet tewm, imqattgħin
- 125 ml inbid abjad
- 50 g ġobon Parmiġġan, maħkuk
- 2 mgħaref ħabaq frisk, imqatta’
Tħejjija:
- F’taġen kbir u fond saħħan iż-żejt taż-żebbuġa fuq nar moderat. Żid il-basla u t-tewm u qalli sakemm jirtabu, imbagħad żid il-faqqiegħ kollu u kompli qalli sakemm jirtab.
- Żid il-quinoa u ħawwad biex tinkesa kollha, imbagħad żid l-inbid u ħawwad sakemm jevapora. Żid kuċċarun stokk u kompli ħawwad sakemm jinxtorob; ibqa’ żid l-istokk ftit ftit sakemm issir il-quinoa (madwar 20 minuta).
- Żid il-ġobon Parmiġġan u l-ħabaq, ħawwad kollox sew u servi fil-pront.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!