Riċetta veġetarjana: Porzjonijiet għall-kolazzjon bil-ħafur (oats) u frott imnixxef

Oat and fruit bars

Is-cereal bars huma popolari u komdi għax huma mod mgħaġġel kif tieħu l-kolazzjon. Riċetti ta’ dawn issib kem trid, u l-biċċa l-kbira tagħhom jinħmew fil-forn. Din ir-riċetta hija aktar faċli għax m’hemmx għalfejn taħmihom, imma tqegħedhom biss fil-friġġ sakemm jagħqdu.

Ħin: 25 minuta

Kwantità: 12

Ingredjenti:

  • 200 g ħafur (oats)
  • 3 mgħaref żrieragħ imħalltin bħal tal-ward tax-xemx, ġunġlien, eċċ.
  • 3 mgħaref lewż jew ġellewż
  • 100 g berquq imnixxef, imqatta’
  • 60 g sultana
  • 90 g butir
  • 2 mgħaref zokkor muscovado
  • Landa kwadra ta’ 18 ċm, jew ekwivalenti, midluka u miksija bil-kartaforn

 

Tħejjija:

  1. Saħħan taġen kbir fuq nar moderat u nkalja l-ħafur għal madwar 3 minuti filwaqt li tħawdu kontinwament. Poġġih fi skutella kbira.
  2. Fl-istess taġen inkalja l-lewż jew ġellewż, ħallih ftit jibred, kissru u żidu mal-ħafur.
  3. Inkalja wkoll iż-żrieragħ għal ftit sekondi biss u żidhom ukoll fl-iskutella.
  4. Poġġi l-berquq u s-sultana fi proċessur tal-ikel u kissirhom sakemm isiru biċċiet żgħar, imbagħad żid it-taħlita tal-ħafur u ħawwad ftit sakemm jitħallat kollox.
  5. F’kazzola dewweb il-butir u żid ukoll iz-zokkor. Ħawwad sakemm jibdew ibaqbqu , imbagħad ferra’ t-taħlita fil-proċessur tal-ikel ukoll. Ħawwad sakemm jitħallat kollox sew.
  6. Ifrex it-taħlita fil-landa ppreparata, illixxaha sew u daħħalha fil-friġġ sakemm tagħqad. Qatta’ f’porzjonijiet.

Ippruvajtha din ir-ricetta ta' porzjonijiet għall-kolazzjon bil-ħafur u frott imnixxef? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!