Riċetta veġetarjana: Pizza bil-faqqiegħ (mushrooms)

Mushroom pizza

Bħall-għaġin, il-pizza hija fost l-aktar ikel favorit f’dawn il-gżejjer; u, bħall-għaġin, tista’ tibdel l-ingredjenti u toħloq riċetta ġdida kull darba li tagħmel pizza.

Ħin: 45 minuta

Kwantità: 2 pizez

Ingredjenti:

  • 500 g għaġina tal-pizza
  • 2 mgħaref żejt taż-żebbuġa
  • 4 siniet tewm, misħuqin
  • 250 g faqqiegħ abjad jew kannella, imqatta’
  • 250 g faqqiegħ imħallat bħal oyster u shiitake, imqatta’
  • Meraq ta’ nofs lumija
  • 150 g ġbejniet imnixxfin tal-bżar, maħkukin
  • Mgħarfa kurrat selvaġġ (chives), imqatta’
  • Mgħarfa tursin frisk, imqatta’
  • Melħ u bżar mitħun frisk

Tħejjija:

  1. Saħħan il-forn għal temperatura ta’ 200°C. Idlek żewġ tilari jew turtieri biż-żejt.
  2. Aqsam l-għaġina fi tnejn, iffurmaha fi blalen u iftagħhom fi ċrieki. Poġġi kull biċċa fuq it-tilar jew turtiera ppreparati u ħallihom għas-sħana tal-forn biex togħla l-għaġina.
  3. Saħħan iż-żejt taż-żebbuġa f’taġen fuq nar moderat. Żid it-tewm u l-faqqiegħ u qalli sakemm jibda jidbiel imma qabel jibda jerħi l-ilma minnu. Neħħih minn fuq in-nar u roxx bil-melħ u l-bżar.
  4. Ferrex il-ġbejniet fuq iż-żewġ ċrieki għaġina, imbagħad iksi bil-faqqiegħ.
  5. Aħmi għal 25-30 minuta sakemm issir u tiħmar l-għaġina.
  6. Roxx il-wiċċ bit-tursin u l-kurrat selvaġġ u servi.

Ippruvajtha din ir-ricetta veġetarjana ta' pizza bil-faqqiegħ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!