Riċetta veġetarjana: Insalata tal-fusilli biċ-ċiċri u ġobon feta

Fussili salad

Din l-insalata ħafifa għandha fiha l-ingredjenti li jagħmluha Mediterranja. It-togħmiet jamalgamaw u joħorġu aktar jekk tħalliha għal ftit tal-ħin fil-friġġ qabel isserviha, u minħabba f’hekk hija adattata ferm biex tittiekel barra mid-dar ukoll.

Ħin: siegħa

Isservi: 4 persuni

Ingredjenti:

  • 350 g għaġin fusilli, jew għaġin simili
  • 200 g tadam ċirasa, maqsum min-nofs
  • 2 sinniet tewm, misħuqin
  • Basla żgħira ħamra, imqattgħa rqiq
  • 4 mgħaref żejt taż-żebbuġa
  • 2 mgħaref ħall tal-inbid abjad
  • Bott ċiċri, imsaffi u mlaħlaħ
  • Ħjara żgħira, mingħajr żerriegħa u mqattgħa
  • 100 g ġobon feta
  • 75 g żebbuġ iswed, mingħajr għadma u mqatta’
  • 2 mgħaref origanu frisk, imqatta’, jew mgħarfa mnixxef

 

Tħejjija:

  1. Għalli l-għaġin f’borma kbira ilma bil-melħ sakemm isir al dente. Saffih f’passatur, laħalħu taħt l-ilma u ħallih joqtor sew.
  2. Sakemm isir l-għaġin, fi skutella ħallat it-tadam, il-basla, it-tewm ,l-origanu, iż-żejt taż-żebbuġa u l-ħall.
  3. Aqleb l-għaġin fi skutella kbira u żid miegħu t-taħlita tat-tadam u ħawwad. Żid ukoll iċ-ċiċri, il-ħjar, iż-żebbuġ u l-ġobon feta. Ħallat kollox bil-mod u poġġi l-insalata għal ftit ħin fil-friġġ qabel isserviha.

Ippruvajtha din ir-ricetta ta' insalata tal-fusilli biċ-ċiċri u ġobon feta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!