Riċetta veġetarjana: Għaġin bebbux mimli bl-irkotta u spinaċi

Ricotta and spinach pasta shells Bebbux mimli bl-irkotta u spinaċi (Philadelphia)

Jekk trid tista' tlesti d-doppju tat-taħlita u tiffriża nofsu għal darb'oħra.

Preparazzjoni: 25 minuta

Ħin totali: siegħa u 30 minuta

Isservi: 4 persuni

Ingredjenti:

  • Basla, imqattgħa
  • 2 sinniet tewm, misħuqin
  • 2 zkuk tal-karfus, imqattgħin
  • 500 g tadam, maqsum u mingħajr żerriegħa
  • 2 mgħaref żejt taż-żebbuġa
  • 400 g polpa tat-tadam
  • 2 mgħaref ħall balsamiku
  • Kuċċarina zokkor
  • Ponn ħabaq frisk, imqatta’
  • 250 g għaġin bebbux kbir bħal conchiglioni
  • 200 g spinaċi
  • 250 g irkotta
  • 100 g ġobon Philadelphia
  • Kuċċarina noċemuskata mitħuna (ground nutmeg)
  • Melħ oħxon u bżar mitħun frisk
  • Bajda
  • 50 g ġobon Parmiġġan

Tħejjija:

  1. Saħħan il-forn għal temperatura ta’ 200°C. 
  2. Ibda billi tagħmel iz-zalza tat-tadam.  
    1. Ħallat flimkien il-basla u t-tewm, il-karfus, it-tadam frisk, iż-żejt taż-żebbuġa, u melħ u bżar f’dixx kbir. Aħmi għal 30 minuta.
    2. Poġġi l-ħaxix fi proċessur tal-ikel u itħan sakemm ikollok taħlita lixxa.
    3. Ferra’ t-taħlta f’kazzola u żid il-polpa tat-tadam, il-ħall balsamiku, iz-zokkor u l-ħabaq.
    4. Poġġi l-kazzola fuq nar għoli sakemm iz-zalza tiftaħ tagħli, imbagħad baxxi n-nar u tektek għal 15-il minuta.
  3. Sadanittant, poġġi borma kbira bl-ilma bil-melħ fuq nar għoli u għalli l-għaġin għal 5-7 minuti, al dente. Saffi l-għaġin u laħalħu bl-ilma kiesaħ.
  4. Poġġi l-ispinaċi f’passatur u ferra’ fuqha kitla misħun jagħli. Ħallih jibred, imbagħad agħsru mill-ilma, qattgħu u poġġih fi skutella.
  5. Żid l-irkotta, il-ġobon Philadelphia, il-bajda, in-noċemuskata u nofs il-ġobon Parmiġġan, melħ u bżar, u ħallat kollox flimkien.
  6. Ferra’ z-zalza fil-qiegħ ta’ dixx. Imla l-għaġin bit-taħlita ta’ spinaċi u rkotta u poġġihom maġenb xulxin fiz-zalza. Roxx bil-ġobon Parmiġġan li jkun fadal.
  7. Għatti d-dix bil-foil u aħmi għal 30 minuta, imbagħad neħħi l-foil u kompli aħmi għal 15-il minuta oħra.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!