Riċetta veġetarjana: Fażola taħraq bil-qamħirrun u l-qargħa ħamra

Din ir-riċetta hija bbażata fuq taħlita ta’ fażola, qargħa ħamra u qamħirrun, li huma favoriti mal-Amerikani nattivi. Tista’ tagħmel dan il-platt jaħraq aktar fit-togħma billi żżidu aktar bżar jaħraq.

Ingredjenti

Għal 6 persuni

  • 450g fażola mħallta, imnaddfa u maħsula, u mxarrba tul il-lejl f’żewġ litri ilma
  • 2 basliet, waħda maqsuma f’erbgħa u l-oħra mqattgħa rqiq
  • 4 sinniet tewm, waħda misħuqa u l-oħra mqattgħa rqiq
  • Werqa tar-rand
  • 2 imgħaref żejt tal-ward tax-xemx
  • 3 imgħaref bżar chilli ħafif (tista’ tuża t-tip li jaħraq jew tuża aktar mill-ħafif)
  • Mgħarfa żerriegħa tal-kemmun, mitħuna
  • Bott ta’ 400 g polpa tat-tadam
  • Niskata zokkor
  • 2 imgħaref kunserva maħlulin f’kikkra ilma
  • 340 g qargħa ħamra, imqattgħa dadi
  • Kikkra qamħirrun, frisk jew iffriżat
  • Melħ
  • ½ kikkra kożbor frisk, imqatta’
  • Ġobon cheddar maħkuk (jekk trid)

Metodu

  1. Poġġi l-fażola bl-ilma f’kazzola kbira.
  2. Żid il-biċċiet tal-basla u ħalliha tiftaħ tagħli. Baxxi n-nar biex tkompli tagħli bil-mod u neħħi xi ragħwa li titla’ fil-wiċċ. Żid it-tewm misħuq u l-werqa tar-rand, baxxi n-nar, għatti u tektek għal 30 minuta.
  3. Żid il-melħ u kompli tektek għal 45-60 minuta. B’mgħarfa mtaqqba tella’ l-basla u l-werqa tar-rand.
  4. Sadanittant saħħan iż-żejt f’taġen kbir bil-qiegħ oħxon u żid il-basla. Qalli għal 5 minuti sakemm tirtab.
  5. Żid niskata melħ ġeneruża u t-tewm imqatta’ u ħawwad għal 30 sekonda. Żid il-bżar chilli u l-kemmun. Ħawwad għal 2-3 minuti sakemm it-taħlita tibda taqbad mat-taġen.
  6. Ferra’ l-polpa tat-tadam, niskata zokkor u melħ. Tektek filwaqt li tħawwad sikwit għal 10 minuti sakemm il-meraq tat-tadam jinxtorob.
  7. Żid il-kunserva fl-ilma u erġa’ tektek. Ħawwad sikwit għal 10 minuti, sakemm it-taħlita tibda tagħqad.
  8. Itfa’ t-taħlita tat-tadam mal-fażola, żid magħhom il-qargħa ħamra u melħ u tektek għal 45 minuta. Ħawwad sikwit biex it-taħlita ma teħilx mal-qiegħ tal-kazzola.
  9. Jekk taħseb li t-taħlita qed tagħqad iżżejjed żidha ftit ilma. Żid il-qamħirrun u tektek għal 10 minuti. Il-fażola trid tkun ratba u z-zalza magħquda u tfuħ. Żid melħ u bżar jekk ikun hemm bżonn.
  10. Żid il-kożbor qabel isservi u tektek għal 5 minuti.
  11. Qassam fil-bwieqi u jekk trid roxx bil-ġobon cheddar maħkuk. Servi mal-gallett jew ħobż tal-qamħirrun.

Biex tipprepara bil-quddiem: il-fażola tista’ ssajjarha tlieta jew erbat ijiem qabel. Iz-zalza wkoll iżżomm fil-friġġ għal tlieta jew erbat ijiem, u tista’ tiffriżaha wkoll.