Meta ma nkunux nafu x’ħaxix se nużaw bħala akkumpanjament dejjem nispiċċaw induru għall-brokkli, iżda nistgħu nagħmluh aktar interessanti. F’din ir-riċetta ta’ patata mgħaffġa u kurrat jieħu forma oħra u jagħti kulur ħadrani sabiħ lil dan il-colcannon (platt tradizzjonali Irlandiż magħmul minn patata mgħaffġa u ħaxix ieħor).
Ħin: 45 minuta
Ingredjenti
Għal 6 porzjonijiet
- 2 brokkliet (madwar 500g)
- 600g patata, maħsula sew u maqsuma fi tnejn jekk tkun kbira
- Melħ
- 1 mgħarfa żejt taż-żebbuġa ekstra verġni
- 2 kurratiet imdaqqsin, il-partijiet bojod u ħodor ċari biss, imnaddfin u mqattgħin
- 3 mgħaref butir mingħajr melħ
- ¾-1 kikkra ħalib
- Bżar mitħun frisk
Metodu
- Għalli borma kbira ilma bil-melħ.
- Sadanittant, neħħi z-zokk l-oħxon tal-brokkli u ħalli l-fjuretti kemm jista’ jkun sħaħ
- Meta jagħli l-ilma niżżel il-brokkli, għalli għal 5 minuti. Qallibhom kultant biex isitu l-istess.
- Tella’ l-brokkli mill-ilma b’mgħarfa mtaqqba u poġġihom f’bieqja bl-ilma kiesaħ. Saffihom u xxutahom fuq sarvetta nadifa. Qattagħhom irqiq u poġġihom f’bieqja.
- Fil-borma bl-ilma jagħli itfa’ l-patata u ħalliha tagħli bil-mod, mgħottija parzjalment, għal 25-20 minuta. Saffi mill-ilma u erġa’ poġġiha fil-borma. Għalaq bl-għatu u ħalliha fil-fwar għal 5 minuti jew aktar. Qaxxar il-patata.
- Saħħan iż-żejt taż-żebbuġa f’taġen u żid il-kurrat. Qalli u ħawwad sikwit għal 3 minuti sakemm il-kurrat jibda jitbiel. Żid il-melħ u kompli qalli għal 3-5 minuti oħra. Neħħi minn fuq in-nar.
- Għaffeġ il-patata u żidha l-melħ u l-bżar.
- Żid il-brokkli mal-patata u ħawwad sew flimkien.
- Saħħan ¾ kikkra ħalib u l-butir flimkien sakemm idub il-butir, imbagħad żidhom mat-taħlita tal-patata u ħabbathom sakemm ikollok taħlita lixxa.
- Żid il-kurrat u ħawwad.
- Jekk trid żid il-kumplament tal-ħalib u aktar melħ u bżar. Servi sħun.
Tista’ tipprepara l-colcannon il-ġurnata ta’ qabel u ssaħħanha billi tagħmilha banjumarija, jew tpoġġiha f’forn b’nar baxx, b’biċċa butir fil-wiċċ biex ma tinxifx.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.