Riċetta veġetarjana: Brunġiel bil-pesto mixwi

Eggplant/ aubergine with pesto

Dan il-brunġiel miksi b’qoxra tal-pesto tal-ħabaq u prinjol jista’ jkun versatili immens għax tista’ sservih kemm bħala l-ewwel platt ma’ insalata u kemm bħala l-platt prinċipali jekk isservih ma’ insalata u patata maxx, u huwa adattat ukoll għal min hu veġetarjan.

Ħin: 45 minuta

Isservi: 2-4 persuni

Ingredjenti:

  • 2 brungiliet
  • Żejt taż-żebbuġa
  • Melħ u bżar mitħun frisk

Għall-pesto:

  • Ponn kbir weraq tal-ħabaq
  • 4 mgħaref prinjol (pine nuts)
  • 4 mgħaref ġobon Parmiġġan, maħkuk
  • 4 sinniet tewm
  • 120 ml żejt taż-żebbuġa

 

Tħejjija:

  1. Saħħan il-forn għal temperatura ta’200°C. Iksi tilar bil-kartaforn.
  2. Neħħi z-zokk tal-brunġiel u aqsamhom min-nofs għat-tul. Bil-ponta ta’ sikkina aqta’ sinjali fondi fil-laħam tal-brunġiel. Idlek il-wiċċ biż-żejt u roxx bil-melħ u l-bżar. Poġġi l-brunġiel ħdejn xulxin fuq it-tilar u aħmihom għal 25-30 minuta jew sakemm jirtabu u l-wiċċ jiskura.
  3. Sadanittant ipprepara l-pesto. Poġġi l-ħabaq, il-120 ml żejt taż-żebbuġa, il-prinjol u t-tewm fi proċessur tal-ikel u itħan sakemm ikollok taħlita lixxa. Poġġi t-taħlita fi skutella, żid il-ġobon Parmiġġan u ħawwad sew.
  4. Idlek il-pesto fuq il-wiċċ tal-brunġiel u daħħalhom taħt grill jaħraq sakemm il-pesto jibda jbaqbaq.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.