Riċetta veġetarjana: Blalen taċ-ċiċri ma’ dip tal-yoghurt

Chickpea balls

Dawn il-blalen taċ-ċiċri huma sors tajjeb ta’ proteina u fibra. Ġejjin mill-Greċja u, għalkemm fir-riċetta oriġinali tagħhom huma moqlijin fiż-żejt, hawn se naħmuhom biex nevitaw il-qali.

Ħin: siegħa u nofs

Isservi: 4-6 persuni

Ingredjenti:

  • 250 g ċiċri mnixxfin
  • 4 sinniet tewm, imqattgħin
  • Basla, imqattgħa rqiq
  • 2 mgħaref żejt taż-żebbuġa
  • 2 mgħaref tursin frisk, imqatta’
  • 2 kuċċarini kemmun
  • 2 kuċċarini żerriegħa tal-kożbor
  • 2 mgħaref dqiq
  • Melħ u bżar mitħun frisk

Għad-dip:

  • 200 g yoghurt Grieg
  • Meraq ta’ nofs lumija
  • 2 mgħaref żejt taż-żebbuġa
  • Mgħarfa tursin frisk, imqatta’
  • Mgħarfa nagħniegħ frisk, imqatta’

 

 Tħejjija:

  1. Xarrab iċ-ċiċri fl-ilma għal 6 sigħat jew tul il-lejl. Saffiha, poġġiha f’kazzola, għattiha bl-ilma u għalliha għal 50-60 minuta jew sakemm tirtab. Saffiha f’passatur, ħalliha toqtor sew u ferrixha fuq sarvetta biex tixxotta sew għal siegħa.
  2. Saħħan il-forn għal temperatura ta’ 180°C. Iksi tilar bil-kartaforn.
  3. Qalli l-basla u t-tewn f’żewġ mgħaref żejt taż-żebbuġa sakemm jirtabu.
  4. Bi proċessur tal-ikel itħan iċ-ċiċri, il-basla u t-tewm, il-kemmun u l-kosbor, sakemm jitħallat u jitkisser kollox.
  5. Aqleb it-taħlita fi skutella u żid id-dqiq, it-tursin, melħ u bżar. Għaffeġ kollox flimkien b’idejk u fforma t-taħlita fi blalen ta’ madwar 3 ċm djametru.
  6. Poġġi l-blalen taċ-ċiċri fuq it-tilar, idlikhom biż-żejt taż-żebbuġa mad-dawra kollha u aħmihom għal 25-35 minuta. Nofs sajran dawwarhom ftit biex isiru minn kullimkien.
  7. Sadnittant, ipprepara d-dip. Fi skutella ħabbat l-ingredjenti kollha flimkien tajjeb.
  8. Servi l-blalen taċ-ċiċri mad-dip tal-yoghurt.

Ippruvajtha din ir-ricetti ta' blalen taċ-ċiċri? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!