Read this in English: Vegetarian recipe: Bavette with spinach and brown button mushrooms
L-għaġin huwa versatili immens, u fil-ġranet ta’ matul il-ġimgħa fejn il-ħin għas-sajran forsi jkun aktar limitat tista’ kważi kważi toħloq platt differenti kuljum bi zlazi li tipprepara b’ingredjenti differenti u fi ftit ħin biss.
Ħin: 40 minuta
Iservi: 5-6 persuni
Ingredjenti:
- 500 g għaġin bavette
- 2 imgħaref żejt taż-żebbuġa
- 2 kurratiet, il-parti bajda u ħadra ċara, maqsumin min-nofs għat-tul u mqattgħin f’biċċiet ta’ 2 ċm
- 3 sinniet tewm, imqattgħin; tista’ minflok tuża tewma friska
- 300 g faqqiegħ mill-kannella (brown button mushrooms), imqatta’
- 300 g weraq tal-ispinaċi
- 280 ml krema singla
- 100 g ġobon artab bħal Philadelphia
- Dada tat-tiġieġ/ ħaxix
- 100 ml inbid abjad
- Melħ u bżar mitħun frisk
- 50 g ġewż pekan, imqatta’
- 50 g ġobon Parmiġġan, maħkuk
Tħejjija:
- F’borma kbira ilma jagħli bil-melħ, għalli l-bavette sakem isiru al dente.
- Sadanittant, f’taġen kbir bil-ġnub għoljin u bl-għatu, saħħan iż-żejt fuq nar moderat u fih qalli l-kurrat u t-tewm sakemm jibdew jirtabu.
- Żid il-faqqiegħ u kompli qalli sakemm dan ukoll jibda jirtab.
- Farrak id-dada fil-wiċċ u żid l-inbid, il-krema u l-ġobon artab, u ħawwad sakemm il-ġobon jinħall u t-taħlita tibda tbaqbaq.
- Poġġi l-weraq tal-ispinaċi fuq kollox u, mingħajr ma tħawwad, għatti t-taġen. Baxxi n-nar u tektek għal 2-3 minuti sakemm jibda jidbiel u jinżel il-weraq tal-ispinaċi. Neħħi l-għatu u ħawwad sakemm jidbiel il-weraq kollu imma ma jitlifx il-kulur.
- Saffi l-għaġin u żidu maz-zalza fit-taġen. Ħawwad bil-mod għal 2 minuti biex iz-zalza tidħol fl-għaġin.
- Servi l-bavette fil-pront bil-ġewż pekan u l-Parmiġġan fil-wiċċ.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.