Read this recipe in English: Recipe: Choco-coffee trifles
Trifles individwali li tista’ tippreparahom minn qabel huma d-deżerta perfetta biex isservihom direttament fuq il-mejda wara l-ikel. Dawn it-trifles fihom it-togħmiet jikkontrastaw ta’ taħlita fina u kremuża taċ-ċikkulata u custard, mat-togħma qawwija tal-isponge mxarrba f’taħlita ta’ kafè u xorb.
Ingredjenti
Għal 2 persuni
- 40g ċikkulata skura ta’ kwalità tajba
- 300ml custard tal-vanilla
- 80ml kafè espresso
- 1 mgħarfa brandy
- 2 mgħaref liqueur tal-kafè
- 200g sponge lixxa
Metodu
- Kisser iċ-ċikkulata u poġġiha f’bieqja fuq kazzola bl-ilma jagħli (banjumarija). Baxxi n-nar biex il-misħun jibqa’ jtektek sakemm tinħall iċ-ċikkulata. Neħħi minn fuq in-nar u ħalliha tibred ftit. Ħu 2 mgħaref miċ-ċikkulata maħlula u fuq biċċa kartaforn oħloq 2 disinni billi ‘tħażżeż’ biċ-ċikkulata li tinżel mill-imgħarfa. Ħalli l-forom jagħqdu u jiksħu kompletament fuq il-karta stess u hekk kif tkun se tużahom aqlagħhom bil-mod minn mal-karta.
- Maċ-ċikkulata li fadal żid il-custard u ħallathom flimkien.
- Ħallat il-kafè mal-liqueur tal-kafè u l-brandy. Qatta’ l-isponge f’dadi żgħar u poġġihom f’bieqja baxxa. Ferra’ t-taħlita tal-kafè fuq l-isponge biex tixxarrab għal ftit minuti.
- F’żewġ tazzi bis-sieq ibda l-ewwel billi tpoġġi ftit mill-custard taċ-ċikkulata fil-qiegħ ta’ kull tazza, imbagħad saff sponge Kompli hekk sakemm tispiċċa b’saff custard. Kessaħ għal 30 minuta, u servi mżejjen bid-disinn taċ-ċikkulata.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.