Riċetta tradizzjonali: Patata l-forn

Picture taken by Daniel Bouwmeester. from freeimages.com

Żgur li l-patata l-forn,  ħafna draba ma' koxxa ta' majjal, tibqa' l-platt tradizzjonali l-aktar favorit għall-ikla ta' nhar ta' Ħadd fost il-Maltin. Tiftakru meta n-nanniet kienu jibgħatu dixx għand il-furnar? Għad hemm xi rħula fejn għadek tista' tgawdi t-togħma speċjali tal-patata l-forn misjura għand il-furnar.

L-ingredjenti ta' dan il-platt huma semplici bħal ma hu biex tħejjih: fi ftit kliem, qatta' ftit patata u basal ġo dixx bi ftit ilma, żid il-majjal, ħawwar u sajjar fil-forn.

Ara r-riċetta t'hawn taħt għal tħejjija iktar dettaljata, u ftakru li dan il-platt jinżel tassew tajjeb ma' kisra ħobż Malti frisk!

Isservi: 2 persuni

Ingredjenti:

  • 2 biċċiet majjal, bħall-kustilji
  • 3 patatiet kbar, mqaxxrin u mqattgħin roti wisgħin
  • Basla kbira mqatta roti roti
  • 2 sinniet tewm maħkuk
  • Cube stokk tat-tiġieg
  • Ftit curry
  • Ftit bużbież (fennel seeds)
  • Bżar u melħ skont il-gosti
  • Ftit żejt taż-żebbuġa
  • Ilma

Tħejjija:

  1. Saħħan il-forn sa 190C. Agħżel dixx tal-forn li hu kbir biżżejjed biex iżomm l-ingredjenti kollha.
  2. Poġġi l-basal fil-qiegħ u raxxax it-tewm fuqu. Farrak il-cube fuq il-basal u t-tewm.
  3. Poġġi l-patata fuq il-basal u t-tewm u ħawwar bil-bużbież, ftit curry, bżar u melħ.
  4. Poġġi l-laham fuq il-patata u erga' ħawwar bil-bużbież, ftit curry, bżar u melħ.
  5. Raxxax iż-żejt taż-żebbuġa fuq kollox.
  6. Żid l-ilma mill-ġenb tad-dixx biex ma titlifx il-ħwawar. Ara li jkun hemm biż-żejjed ilma li l-ikel ma jinxifx u jeħel mad-dixx, iżda mhux iżżejjed li tiksi l-patata sa fuq nett; tinsiex li l-patata tal-wiċċ trid tiħmar fil-forn kif ukoll il-laħam.
  7. Sajjar sakemm il-laħam ikun sar u l-patata tal-wiċċ tkun ħmaret, għal madwar siegħa jew ftit iktar. Kultant ittawwal fil-forn u ara li l-ilma ma nixifx; żid iktar jekk hemm bżonn.