Riċetta tradizzjonali: Pastizzi tal-irkotta

By Charles Haynes (Flickr) [CC-BY-SA-2.0 (http://creativecommons.org/licenses/by-sa/2.0)], via Wikimedia Commons

Il-pastizzi huma sinonimi ma' dak kollu li hu Malti. Ħadd ma jżur pajjiżna mingħajr ma jduqhom u ma jkunx hemm okkażjoni fejn ma ssibx il-pastizzi. Sa hemm espressjoni Maltija li tgħid, "Jinbiegħ bħall-pastizzi", meta xi oġġett ikun popolari mal-konsumatur. Il-pastizzi li huma l-aktar popolari huma dawk tal-irkotta, bħal fir-riċetta t'hawn taħt, jew tal-piżelli, iżda ssib ukoll mili ieħor bħall-inċova. Prova din ir-riċetta u ara jirnexxilekx tagħmilhom tajbin bħal dawk li tixtri mingħand 'tal-pastizzi.'

Għaġina:

  • 400g dqiq
  • Ilma 
  • Melħ
  • 50g soft shortening
  • 50g marġerina

Mili:

  • 400g irkotta
  • 4 bajdiet
  • Melħ u bżar

Tħejjija:

  1. Saħħan il-forn għal 200 C.
  2. Poġġi d-dqiq ġo skutella u żid biżżejjed ilma biex tagħmel għaġina niexfa u magħquda.
  3. Ħabbat ġo mixer fuq veloċità medja sakemm it-taħlita ssir waħda. Jekk l-għaġina tiġi twaħħal wisq, żid ftit dqiq.
  4. Iftaħ l-għaġina għal ħxuna ta' madwar 3mm fuq wiċċ ċatt miksi bi ftit dqiq.
  5. B'idejk, iksi l-għaġina bix-shortening.
  6. Irrombla l-għaġina qisek qiegħed tagħmel Swiss roll.
  7. Erġa' iftaħ l-għaġina u din id-darba iksi bil-marġerina. Erġa' rromblaha. 
  8. Biex tgħamel il-mili, itfa' l-irkotta ġo skutella u żid il-bajd u ftit melħ skont il-gosti. Ħawwad kollox b'furketta.
  9. Meta tkun lest biex tagħmel il-pastizzi, erga' iftaħ l-għaġina.
  10. Qatta' ċrieki ta' madwar 10cm u itfa' 2-3 imgħaref mili. Itwi l-għaġina b'tali mod li tagħmel żewġ trufijiet, tħalli miftuħ min-nofs imma l-mili ma joħroġx waqt it-tisjir.
  11. Sajjar fil-forn għal madwar 20-25 minuti sakemm jismaru.