Riċetta tradizzjonali: Lampuki moqli biz-zalza tal-kappar

iStock_000042693738_Small

Il-lampuki huwa l-ħut favorit tal-Maltin. Żmienu huwa bejn Awissu u Novembru, imma l-iktar f'Settembru, waqt li jkun għaddej mill-ibħra tagħna fi triqtu minn naħa t-isfel tal-Mediterran lejn il-fuq. Għandhu vizzju jiskenn mix-xemx taħt id-dell ta' kull ma jsib f'nofs ta' baħar, u s-sajjieda Maltin jagħmlu l-kannizzati tal-qasab biex jipprovdulu dan id-dell biex imbghad joħorġu jistgħadu għalih. Meta l-baħar ikun kalm jinqabad l-aktar ħut. 

Wieħed mill-platti tradizzjonali b'dan il-ħut huwa l-lampuki moqli biz-zalza tal-kappar, u tista' ssib it-tħejjija għal din ir-riċetta hawn taħt: 

Isservi: 2-3 persuni

 

Ingredjenti:

  • Lampuka mdaqqsa
  • Ftit dqiq
  • 4 tadamiet tondi
  • 2 imgħaref  żebbuġ iswed bla għadam u mqatta' roti
  • 2 imgħaref kappar
  • 6 sinniet tewm maħkuk
  • Ħabaq (basil), nagħniegħ (mint) u merqtux (marjoram) mqatta' fin
  • Bżar u melħ
  • Żejt taż-żebbuġa Carapelli
  • Ħall aħmar jew abjad

Tħejjija:

Għall-ħuta:

  1. Naddaf il-ħuta inkella ixtrija mnaddfa lesta. Neħħilha r-ras u d-denb.
  2. Qatta' l-ħuta f'biċċiet żgħar.
  3. Ħawwar id-dqiq bil-bżar u l-melħ.
  4. Bill kull biċċa ħuta fid-dqiq mħawwar, u neħħi d-dqiq żejjed.
  5. Saħħan it-taġen biż-żejt taż-zebbuġa.
  6. Aqli l-ħut fuq naħa waħda sakemm jismar sew, imbgħad dawwar biex taqli n-naħa l-oħra.
  7. Ibqa' aqli sakemm il-ħut ikun sar sew.

 Għaz-zalza:

  1. Poġġi t-tadam ġo ftit misħun għal 2 minuti, neħħih l-ilma u kessaħ it-tadam ġo l-ilma bis-silġ. Neħħi l-qoxra u qatta' f'biċċiet żgħar. 
  2. Laħlaħ il-kappar taħt l-ilma tal-vit biex tneħħi l-melħ żejjed minn miegħu.
  3. Saħħan imgħarfa żejt taż-żebbuġa ġo taġen kbir fuq nar medju-għoli.
  4. Aqli t-tewm sakemm jismar ftit.
  5. Żid il-kappar u l-ħxejjex aromatiċi (il-ħabaq, in-nagħniegħ u l-merdqux), ħawwad sew u sajjar għal madwar 2 minuti.
  6. Żid it-tadam, ħawwad sew, għatti t-taġen u sajjar it-taħlita sakemm iz-zalza tibda tbaqbaq. 
  7. Baxxi n-nar u ħalli z-zalza ttektek, mikxufa, għal madwar 15-il minuta.
  8. Żid iż-żebbuġ iswed, il-ħall u ftit bżar iswed sont il-gosti; ħawwad sew.
  9. Kompli sajjar sakemm iz-zalza tkun nixfet u saret ta' konsistenza magħquda.
  10. Żid il-melħ skont il-gosti, jekk hemm bżonn. Żomm f'moħħok li l-kappar huwa mielaħ mela duq iz-zalza qabel traxxax il-melħ.

Servi l-ħut immedjatament bi ftit lumi, biz-zalza u biċ-ċips ma ftit ħobż tal-Malti frisk u tazza nbid abjad.