Il-bigilla hija riċetta tradizzjonali magħmula mill-ful tal-ġirba. Dan il-ful fih ħafna fibra, proteina u karboidrati, filwaqt li ż-żejt taż-żebbuġa (mhux imsaħħan) huwa wkoll tajjeb għas-saħħa (inaqqas il-kolesterol u tajjeb għall-għadam). Għalhekk tista' tiekol il-bigilla ta' kuljum jekk tixtieq, bħala parti importanti tad-dieta tiegħek. Il-bigilla ta' spiss tittiekel weħidha bħala dip bil-galletti jew bil-ħobż tal-Malti. Tista' wkoll iddaħħalha mal-insalati jew inkella bħala parti minn platt prinċipali tal-laħam jew il-ħut.
Ħafna mill-Maltin għandhom ir-riċetta tal-familja tagħhom u dawn ivarjaw xi ftit. Bir-riċetta t'hawn taħt għandek issib bidu, imbagħad tista' tesperimenta bil-kwantitajiet u b'xi ingredjenti oħrajn, bħan-nagħniegħ (mint) u l-merqtux (marjoram), biex toħloq ir-riċetta favorita tiegħek.
Ingredjenti:
- Nofs kilo ful tal-ġirba niexef
- Imgħarfa tursin imqatta'
- Ftit Tabasco
- 5 sinniet tewm maħkuk
- Il-meraq ta' nofs lumija
- 4 imgħaref żejt taż-żebbuġa
- Felfel (bżaru aħmar) niexef, imfarrak
- Melħ skont il-gosti
Nota: Il-kwantitajiet tat-tursin, tewm, it-tabasco, il-meraq tal-lumi kif ukoll iż-żejt taż-żebbuġa jistgħu jinbidlu skont il-gosti.
Tħejjija:
- Iksi l-ful bl-ilma u ħallieh jixxarrab għal 24 siegħa.
- Biddel l-ilma u żid il-melħ. Għallieh fil-pressure cooker għal madwar 20 minuta, jew ġo borma għal madwar siegħa u nofs jew sakemm il-ful ikun irtab.
- Itfa' l-ful fil-blender, żid ftit mill-ilma li għallejtu ġo fih u ħawwad.
- Żid it-tursin, it-Tabasco, it-tewm, il-meraq tal-lumi u ż-żejt taż-żebbuġa u erga' ħawwad fil-blender.
- Poġġi ġo skutella u raxxax il-frak tal-felfel fil-wiċċ. Raxxax biż-żejt taż-żebbuġa. Servi jew żomm fil-friġġ.
Servi l-bigilla sħuna jew kiesħa, bil-galletti jew bil-ħobż tal-Malti frisk.
Jekk il-bigilla tinxef u tibbies meta tiksaħ, żid ftit ilma jaħraq u ħawwadha.