Riċetta: Tortellini biz-zalzett tal-Malti u bżar aħdar

Tortellini with Maltese sausage and green pepper: Tortellini biz-zalzett tal-Malti u bżar aħdar

Platt Mediterranju għall-aħħar b’ingredjenti bħal tortellini, bżar aħdar u tadam, imbagħad biż-żieda taz-zalzett tal-Malti favorit ma’ ħafna. Dejjem għandek l-għażla li tibdel u tuża tip ta’ zalzett ieħor minflok, bħal chorizo, għalkemm it-togħma aħħarija ma tkunx l-istess. Peress li din iz-zalza għandha togħma ftit b’saħħitha l-aħjar tortellini li tuża huma dawk mimlijin bil-ġobon.

Ħin: 50 minuta

Isservi: 4 persuni

Ingredjenti:

  • 350 g zalzett tal-Malti
  • Kikkra ilma
  • Kikkra basal imqatta’
  • 2 sinniet tewm, imqattgħin
  • Mgħarfa żejt taż-żebbuġa
  • 800 g polpa tat-tadam
  • 2 mgħaref kunserva
  • 80 ml inbid aħmar
  • 2 mgħaref tursin frisk, imqatta’
  • Kuċċarina origanu mnixxef
  • ¼ kuċċarina bżar aħmar jaħraq, imfarrak
  • Bżaru aħdar ħelu (capiscum), imnaddaf u mqatta’ biċċiet ta’ 1ċm
  • 350 tortellini tal-ġobon imnixxfin; jew 450 g friski

Tħejjija:

  1. Poġġi z-zalzett u l-ilma f’taġen kbir u għoli fuq nar moderat. Għalli, għatti t-taġen, baxxi n-nar u tektek għal 10 minuti.
  2. Saffi mill-ilma u kompli sajjar iz-zalzett fl-istess taġen għal madwar 4 minuti oħra sakemm jibda jiħmar. Meta jibred qattgħu f’biċċiet djagonali ta’ 1 ċm.
  3. Imsaħ it-taġen bil-karti tal-kċina. Fl-istess taġen saħħan iż-żejt taż-żebbuġa u qalli l-basal u t-tewm sakemm jirtabu.
  4. Żid il-polpa tat-tadam, il-kunserva, l-inbid, it-tursin, l-origanu u l-bżar aħmar jaħraq. Żid ukoll iz-zalzett u l-bżar aħdar imqatta’.
  5. Meta z-zalza tiftaħ tagħli, baxxi n-nar, għatti t-taġen u tektek għal 20 minuta jew sakemm iz-zalza jkollha konsistenza ftit magħquda.
  6. Sadanittant għalli kazzola bl-ilma bil-melħ u itfa’ t-tortellini. Għalli għal madwar 15-il minuta t-tortellini mnixxfin, u 8-10 minuti t-tortellini friski. Saffi t-tortellini mill-ilma.
  7. Servi t-tortellini sħan biz-zalza fuqhom.

Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.