Read this in English: Ricotta and fresh strawberry almond pastry pie
Bl-abbundanza ta’ frawli frisk li hawn fis-suq ta’ min wieħed juża minnu kemm jista’ la hu il-waqt. Riċetti ssib kemm trid u ħafna drabi nsibu l-kumbinazzjoni ta’ frawli u krema jew frawli u ċikkulata. Din it-torta hija b’mili tal-irkotta f’għaġina ftit differenti għax fiha l-lewż mitħun miżjud magħha. L-aħjar li sservi din it-torta sa siegħa minn xħin timlieha biex tibqa’ friska mingħajr ma tixxarrab l-għaġina.
Ħin: siegħa u 45 minuta
Isservi: 8 persuni
Ingredjenti:
Għall-għaġina:
- 275 g dqiq
- 150 g butir kiesaħ, imqatta’ dadi
- 4 mgħaref zokkor fin (caster sugar)
- 100 g lewż mitħun
- Bajda, imħabbta ħafif
Għall-mili:
- 500 g irkotta
- 100 g zokkor fin
- 150 ml krema doppja
- ½ kuċċarina essenza tal-vanilla
- 250 frawli, imnaddaf u mqatta’ għat-tul
- 75 g zokkor
Tħejjija:
- Għarbel id-dqiq fi skutella u żid miegħu il-butir. Ogħrok il-butir fid-dqiq bil-ponot ta’ subgħajk sakemm it-taħlita ssir bħal frak tal-ħobż.
- Żid il-lewż mitħun u ħallat. Żid il-bajda u għaqqad l-ingredjenti flimkien b’mgħarfa. Tella’ t-taħlita fuq il-mejda u aħdimha sakemm ikollok għaġina lixxa. Geżwirha f’borża u poġġiha fil-friġġ għal 30 minuta.
- Saħħan il-forn għal temperatura ta’ 200°C. Idlek turtiera ta’ 20 ċm u iksi l-qiegħ bil-kartaforn.
- Iftaħ l-għaġina għal ħxuna ta’ 1 ċm u biha iksi t-turtiera. Iksi l-għaġina bil-kartaforn u mlieha bil-fażola niexfa.
- Aħmi għal 15-il minuta (bake blind), imbagħad oħroġha mill-forn, neħħi l-fażola u l-kartaforn u kompli aħmiha għal 15-20 minuta oħra sakemm issir u tiħmar. Ħalli l-għaġina tiksaħ kompletament qabel timlieha.
- Fi skutella ħabbat sew flimkien l-irkotta, iz-zokkor fin u l-essenza tal-vanilla sakemm ikollok taħlita lixxa.
- Fi skutella oħra ħabbat il-krema sakemm tibda tieqaf. Daħħal il-krema bil-mod fit-taħlita tal-irkotta.
- Aqleb it-taħlita fit-turtiera bl-għaġina u ifrixha ugwalment. Irranġa l-biċċiet tal-frawli fuq il-wiċċ.
- Ipprepara skutella kbira bl-ilma kiesaħ. F’kazzola żgħira ħoll il-75 g zokkor fuq nar moderat mingħajr ma tħawwad sakemm jibda jieħu kulur dehbi fil-kannella. Malajr niżżel il-qiegħ tal-kazzola fl-iskutella bl-ilma u ferra l-karamel fuq il-frawli.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.