Riċetta: Torta tal-irkotta ħelwa bil-ġellewż u ċ-ċikkulata

: Sweet ricotta pie with hazelnuts and chocolate Torta tal-irkotta ħelwa bil-ġellewż u ċ-ċikkulata: Sweet ricotta pie with hazelnuts and chocolate

Read this in English: Recipe: Sweet ricotta pie with hazelnuts and chocolate

Fil-ħelu Mediterranju l-irkotta hija ingredjenti popolari. Din hija riċetta ta’ torta ħelwa li hija mfittxija ħafna mil-Maltin, speċjalment f’okkażjonijiet speċjali bħall-Milied, l-Għid u l-festa tar-raħal.

Ħin: siegħa u 30 minuta

Isservi: 12-il persuna

Ingredjenti:

Għall-għaġina:

  • 150 g dqiq, mgħarbul
  • 60 g lewż pur mitħun
  • 60 g zokkor tal-ġelu (icing sugar)
  • 125 g butir, kiesaħ u mqatta’ dadi
  • L-isfar ta’ bajda

Għall-mili:

  • 100 g ġellewż
  • 500 g irkotta
  • 100 g zokkor fin (caster sugar)
  • 125 ml krema doppja
  • Qoxra maħkuka ta’ nofs larinġa
  • 2 bajdiet, imħabbtin ħafif
  • 100 g ċikkulata skura, imkissra
  • 100 g konfettura
  • 2 imgħaref brandy
  • Zokkor tal-ġelu (icing sugar), biex troxx

Tħejjija:

  1. Biex tagħmel l-għaġina:
    1. Poġġi d-dqiq u l-butir fi skutella kbira u daħħal il-butir fid-dqiq bil-ponot ta’ subgħajk (rubbing in) sakemm isir qisu frak tal-ħobż.
    2. Żid iz-zokkor tal-ġelu u l-lewż mitħun u ħallat kollox flikien.
    3. Żid l-isfar tal-bajda u ibda għaqqad it-taħlita b’idek fl-iskutella stess.
    4. Meta tagħqad, roxx il-mejda bid-dqiq u kompli għaġinha fuq il-mejda sakemm tillixxa.
    5. Geżwirha f’borża u poġġiha fil-friġġ għal 30 minuta.
  2. Sadanittant, saħħan il-forn għal temperatura ta’ 180°C.
  3. Ifrex il-ġellewż fuq tilar u nkaljah għal madwar 10 minuti jew skemm jibda jiħmar. Ħalli l-ġellewż jibred għal 5 minuti, imbagħad qiegħdu f’sarvetta nadifa u ogħrku biex taqla l-ħliefa. Agħżel il-ġellewż u kissru ftit.
  4. Poġġi l-irkotta fi skutella u għaffiġha b’furketta.
  5. Żid il-krema u l-bajd u daħħalhom sew fl-irkotta.
  6. Żid il-qoxra tal-larinġa, il-brandy, il-konfettura, iz-zokkor fin u ċ-ċikkulata u ħawwad kollox sew.
  7. Idlek turtiera ta’ 20 ċm bil-butir. Iftaħ l-għaġina u iksi t-turtiera. Imla bit-taħlita tal-irkotta u llixxa l-wiċċ.
  8. Aħmi għal 45-50 minuta jew sakemm tara li l-għaġina saret u l-mili ssoda.
  9. Itfi l-forn u ħalli t-torta ġewwa għal siegħa sakemm tibred u toqgħod.
  10. Servi t-torta biz-zokkor tal-ġelu mgħarbul fil-wiċċ.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.