Il-Cottage Pie Ingliża hija torta delizjuża tradizzjonali ħafna bil-laħam ikkapuljat b’saff patata maxx. Serviha bil-piżelli.
Isservi: 6
IngredJenti
- 450 g ikkapuljat taċ-ċanga bla xaħam
- basla mqattgħa f’biċċiet żgħar
- 3 karrotti mqattgħin f’biċċiet żgħar (diced)
- 2 mgħaref dqiq (all-purpose)
- 1/2 mgħarfa kannella mitħun (cinnamon)
- mgħarfa ħwawar Taljani
- 2 mgħaref tursin imqatta’
- Kikkra u 1/2 brodu taċ-ċanga
- mgħarfa kunserva
- bżar u melħ (kemm tridu)
- 4 patata, imqaxxra u mqattgħa f’biċċiet żgħar
- 1/4 ta' kikkra butir artab
- kikkra ħalib
- 110 g ġobon Cheddar imqatta’ biċċa biċċa
Metodu:
- Saħħan il-forn minn qabel sa’ 200 °C.
- Biex tagħmel il-mili tal-laħam: qiegħed taġen kbir fuq sħana medja, farrak l-ikkapuljat u sajjar għal minuta. Żid il-basla u l-karrotti, u kompli sajjarhom sakemm il-laħam ma jibqax roża u l-basla tibda ssir kannella, għal xi 5 minuti. Żid id-dqiq, il-kannella, il-ħwawar u t-tursin.
- Fi skutella żgħira, ħallat il-brodu u l-kunserva, imbagħad żidhom mat-taħlita tal-laħam. Żid bżar u melħ kemm trid, u ħalli t-taħlita ttektek għal 15-il minuta, u ħawwadha kultant, sakemm il-likwidu kważi jinxtorob kollu. Qiegħed it-taħlita f’dixx ta’ 9 pulzieri.
- Biex tagħmel it-taħlita tal-patata: qiegħed il-patata mqattgħa f’kazzolla medja. Imlieha bl-ilma u qegħedha fuq nar għoli. Ħallihom jagħlu. Saffihom. Għaffeġ il-patata sakemm ma jibqax biċċiet fiha u żid il-butir jew marġerina, imbagħad żid il-ħalib. Ħallathom flimkien. Żid bżar u melħ kemm trid. Xerred il-patata maxx fuq it-taħlita tal-laħam. Itfa ċ-Cheddar fuq il-wiċċ.
- Qiegħed fil-forn (imsaħħan minn qabel) għal 25 minuta, sakemm il-wiċċ jiskura u l-ġobon ikun qed ibaqbaq.
Ippruvajtha din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.