Riċetta: Torta tal-ġbejniet u l-pitravi

Riċetta: Torta tal-ġbejniet u l-pitravi

It-torti huma wieħed mill-aktar ikel li tista’ tippakkjah biex tieklu barra mid-dar. Din it-torta hija adattata għal xi picnic fi tmiem il-ġimgħa għax tista’ tittiekel kemm sħuna u kemm kiesħa.

Ingredjenti

Għal 8 porzjonijiet

  • 400g pitravi
  • 30g butir
  • 1 mgħarfa żejt taż-żebbuġa
  • 2 basliet ħomor, imqattgħin irqiq
  • 60ml ħall balsamiku
  • 2 kuċċarini sagħtar, u aktar biex troxx
  • 1 mgħarfa zokkor
  • 150g ġbejniet bojod nixfin
  • 2 bajdiet, imħabbtin ħafif
  • 150ml krema doppja
  • ½ kuċċarina noċemuskata, maħkuka
  • 250g creme fraiche jew krema qarsa (sour cream)
  • 2 kuċċarini mustarda Dijon
  • 1 mgħarfa meraq tal-lumi
  • Melħ u bżar mitħun frisk

Għall-għaġina

  1. 200g dqiq, mgħarbul
  2. 100g butir, kiesaħ
  3. 1 kuċċarina sagħtar, imqatta’ rqiq

 

Metodu

  1. Poġġi l-pitravi f’kazzola bl-ilma u għalli. Baxxi n-nar u tektek għal-siegħa. Żid aktar ilma jekk ikun hemm bżonn. Neħħi minn fuq in-nar, laħlaħ bl-ilma kiesaħ u berred. Qaxxar il-pitravi u ħokku oħxon.
  2. Sadanittant poġġi d-dqiq u l-butir f’bieqja u, bil-ponot ta’ subgħajk daħħal il-butir fid-dqiq sakemm it-taħlita ssir qisha frak tal-ħobż. Żid is-sagħtar u ħawwad. Żid madwar 60ml ilma kiesaħ biex tgħaqqad it-taħlita f’għaġina. Agħġen sakemm tiġi tleqq u ssir elastika. Geżwer l-għaġina fil-plastik u kessaħha fil-friġġ għal 30 minuta.
  3. Idlek turtiera ta’ 30ċm biż-żejt. Roxx il-wiċċ li se taħdem fuqu bid-dqiq u iftaħ l-għaġina għal ħxuna ta’ 5mm. Iksi t-turtiera bl-għaġina u kessaħ għal 15-il minuta.
  4. Saħħan il-forn għal temperatura ta’ 180°C. Iksi l-għaġina bil-kartaforn u imlieha bil-piżelli/fażola niexfa jew ross nej biex ittaqqalha u ma tintnefaħx waqt il-ħami (baked blind). Aħmi għal 10 minuti, neħħi l-mili u l-kartaforn u kompli aħmi għal 5 minuti oħra sakemm l-għġina tixxotta u taqbad tiħmar.
  5. Saħħan il-butir f’taġen fuq nar medju. Żid il-basal u kuċċarina melħ u qalli għal 6-8 minuti sakemm jirtab il-basal. Żid il-pitravi maħkuka, il-ħall balsamiku, is-sagħtar u z-zokkor. Ħawwad għal 5 minuti sakemm it-taħlita tibda tagħqad. Ifrex it-taħlita tal-pitravi fuq l-għaġina, imbagħad farrak il-ġbejniet fuqha.
  6. Ħabbat il-bajd, il-krema u n-noċemuskata flimkien u ferra’ fuq it-torta. Roxx b’aktar sagħtar u aħmi għal 35 minuta jew sakemm tagħqad.
  7. Sadanittant ħallat flimkien il-creme fraiche jew krema qarsa, il-mustarda u l-meraq tal-lumi. Żid ftit bzar u melħ u kessaħ.
  8. Aqta’ t-torta f’porzjonijiet u servi sħuna jew kiesħa maz-zalza tal-krema u mustarda.

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.