Riċetta: Torta tal-ananas (pineapple) u l-Philadelphia

Riċetta: Torta tal-ananas u l-Philadelphia

Hemm ħafna tipi ta' torti tal-ħelu li ma jeħtiġux tisjir, u bosta kejkijiet iffriżati b'riċetti sempliċi u li tant huma tajbin li ma jiddispjaċikx li ma ntfajtx taħmi. Speċjalment jekk ma tħossokx komdu ssajjar il-kejkijiet fil-forn, u forsi mhux l-ewwel darba li fallejt f'xi tentattiv, mela dawn it-tip ta' riċetti aktar jgħoddu għalik. Ħu pjaċir waqt li qiegħed tagħmel din ir-riċetta tat-torta tal-ananas u l-Philadelphia.

Isservi: 10 - 12-il porzjon

Ingredjenti:

  • 150 g gallettini tal-ġinġer (gingersnaps) imfarrkin fini
  • 1/2 kikkra frak tal-ħobż
  • 1/3 ta' kikkra butir imdewweb
  • 4 bajdiet, ifred l-isfar
  • 1/2 kuċċarina krema tartara (potassium bitartrate jew potassium hydrogen tartrate)
  • 3/4 ta' kikkra zokkor
  • 350 g Philadelphia cream cheese, fit-temperatura tal-kamra
  • Kikkra ananas 
  • kikkra u 1/4 panna (whipping cream)
  • Kuċċarina vanilja

Għall-iżmalt:

  • 1/4 ta' kikkra zokkor
  • 4 kuċċarini cornstarch
  • Kikkra meraq tal-ananas
  • 2 imgħaref rum skur (jew skont it-togħma)

Tħejjija:

  1. Ħallat il-gallettini u l-frak tal-ħobż ġo skutella mezzana. Żid il-butir imdewweb u ħawwad sakemm il-frak tal-ħobż ikun ixxarrab sew.
  2. Agħfas it-taħlita mal-qiegħ ta' forma tal-kejkijiet li tinfetaħ ta' madwar 22 ċm.
  3. Ħallat l-abjad tal-bajd u l-krema tartara b'mixer sakemm jitla'. Żid 1/4 ta' kikkra zokkor u erġa' ħabbat sakemm it-taħlita tifforma ponot ponot. 
  4. Ħabbat il-Philadelphia u l-kumplament taz-zokkor ġo skutella kbira sakemm isir bellusi. Żid l-isfar tal-bajd u ħabbat sew. Ħallat l-ananas u l-vanilja.
  5. Ħabbat il-panna ġo skutella oħra sakemm titla'.  Itwi l-abjad tal-bajd ġot-taħlita tal-krema imbagħad daħħal il-panna bil-mod.
  6. Ferra' t-taħlita fuq il-gallettini u itfa' fil-friża għal-ħames sigħat jew iktar.

Għall-iżmalt:

  1. Ħallat iz-zokkor u l-cornstarch ġo skutella żgħira.
  2. Żid il-meraq tal-ananas u ħawwad sakemm il-cornstarch ikun inħall.
  3. Żid ir-rum u sajjar fuq nar medju, dejjem ħawwad, sakemm it-taħlita tagħli u tagħqad. Ħalli jibred.

 

Biex isservi, ħalli t-torta toqgħod fit-temperatura tal-kamra minn 5-10 minuti. Dawwar sikkina mal-ġnub tal-kejk biex tħollu u toħorġu minn ġol-forma. Iksi ċ-cheesecake bl-iżmalt.

 

 

Ippruvajt din ir-riċetta?  Kif sibtha? Għidilna billi tħalli kumment hawn taħt.