It-tiġieġ huwa sors ta’ proteina ta’ kwalità għolja u b’kontenut baxx ta’ xaħam. Għalhekk huwa sikwit rakkomandat biex jittiekel minflok laħam aħmar,bħal majjal u ċanga, mit-tobba u dawk li jagħtu pariri fuq in-nutrizzjoni. Dan il-platt imħawwar b’ingredjenti Mediterranji, li aktar imdorrijin nikkombinaw mal-ħut milli mat-tiġieġ, huwa faċli ħafna biex tippreparah.
Ingredjenti
Għal 4 persuni
- 1 mgħarfa żejt taż-żebbuġa
- Tiġieġa ta’ 1½ kg, maqsuma fi 8 biċċiet
- 3 basliet, imqaxxrin u mqattgħin irqiq
- 250ml sherry
- 250ml stokk tat-tiġieġ
- 175g żebbuġ iswed
- 2 mgħaref kappar
- 4 sinniet tewm, imqatta’ rqiq
- 1 kuċċarina paprika
- 1 kuċċarina oriġanu
- 1 kuċċarina sagħtar
Saħħan il-forn għal temperatura ta’ 180°C. Saħħan iż-żejt taż-żebbuġa f’taġen u sajjar it-tiġieġa għal madwar 5 minuti fuq kull naħa sakemm tieħu l-kulur, poġġi t-tiġieġa f’dixx li jidħol fil-forn u żommu għas-sħana. Fl-istess taġen li tkun sajjart it-tiġieġa qalli l-basal għal madwar 4 minuti filwaqt li tħawwad sikwit biex ma jinħaraqx. Żid miegħu x-sherry u l-istokk tat-tiġieġa u ħalli fuq in-nar sakemm jisħon sew, imbagħad itfa’ ż-żebbuġ, il-kappar, u t-tewm. Roxx il-paprika, l-oriġanu u s-sagħtar u ħawwad. Ferra’ t-taħlita fuq il-wiċċ tat-tiġieġa.
Għatti d-dixx bil-foil jew karta tal-forn u aħmi fl-ixkaffa tan-nofs għal 30 minuta. Ikxef it-tiġieġa u kompli sajjar għal 30 minuta oħra jew sakemm tara li t-tiġieġa saret sewwa u l-wiċċ ħa kulur ħamrani. Itfi l-forn u ħalli l-ikel fih għal madwar 20 minuta sakemm joqgħod u t-togħmiet jamalgamaw.
