Riċetta: Tiġieġa bil-ħaxix u ħafna ħwawar imħalltin stil Indjan

Indian Chicken Curry

Dan il-platt stil Indjan għandu togħmiet qawwija u palat jaħraq li forsi mhumiex għall-gosti ta’ kulħadd, imma dawk li jogħġobhom dan it-tip ta’ ikel żgur li jinżlilhom għasel servut mar-ross.

Preparazzjoni: siegħa

Ħin totali: siegħa u 45 minuta

Isservi: 4 persuni

Ingredjenti:

  • Tiġieġa ta’ madwar 1.5 kg, maqsuma fi 8 biċċiet
  • ½ kuċċarina żagħfran tal-Indja (turmeric)
  • Biċċa (4 ċm) ġinġer frisk, imqaxxar u mqatta’ rqiq
  • Meraq ta’ nofs lumija
  • Niskata melħ
  • 2 imgħaref żejt veġetali
  • Bżaru felfel, imqatta’
  • Kuċċarina żerriegħa tal-mustarda (mustard seeds)
  • ½ kuċċarina żerriegħa tal-bużbież (fennel seeds)
  • ½ kuċċarina żerriegħa tal-kemmun (cumin seeds)
  • ½ kuċċarina trab tal-kannella (ground cinnamon)
  • Mgħarfa dqiq
  •  3 sinniet tewm, misħuqin
  • ½ bżaru aħdar ħelu (capiscum)
  • Basla kbira, imqattgħa
  • 400 g polpa tat-tadam
  • 2 patatiet kbar, imqaxxrin u mqattgħin f’biċċiet daqs ta’ gidma
  • 200 g kaboċċa mqattgħa rqiq
  • 200 g piżelli tal-friża, bil-friża mniżżla u msaffija

Tħejjija:

  1. Neħħi l-ġilda minn mal-biċċiet tat-tiġieġa. Fellel il-laħam ta’ kull biċċa sakemm is-sikkina tasal sal-għadam.
  2. Fi skutella, ħallat iż-żagħfran tal-Indja, il-meraq tal-lumi u l-melħ, imbagħad ogħrok it-taħlita fil-biċċiet tat-tiġieġ u ħallihom jimmarinaw għal 30 minuta.
  3. Saħħan iż-żejt f’taġen kbir. Żid il-felfel u ż-żerriegħa tal-mustarda, tal-bużbież u tal-kemmun, u ħallihom jitqallew (f’dan il-ħin jistgħu jfaqqgħu u jfexfxu) għal ftit minuti.
  4. Żid it-trab tal-kannella, ħawwad il-ħin kollu u oqgħod attenta li ma jinħarqux.
  5. Żid it-tewm, il-bżar aħdar ħelu u l-basla u kompli qalli għal ftit minuti oħra.
  6. Zid ukoll id-dqiq u kompli ħawwad għal minuta oħra.
  7. Żid it-tiġieġ u l-polpa tat-tadam u ħawwad kollox flimkien. Għatti t-taġen u tektek għal 15-il minuta.
  8. Żid il-patata, għatti u tektek għal 15-il minuta.
  9. Żid il-kaboċċa u l-piżelli u kompli tektek għal 10 minuti oħra jew sakemm it-tiġieġa tkun saret kompletament.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!