Riċetta: Tiġieġ f’panura tat-tewm u ġunġlien

CHicken in sesame and garlic breadcrumbs

Dawn il-biċċiet tat-tiġieġ huma ideali biex tagħmilhom burger, jew isservihom ma’ insalata jew bħala finger food ma’ dipp ftit taħraq meta jkollok il-mistednin.

Ħin: 30 minuta

Isservi: 4 persuni

Ingredjenti:

  • 500 isdra tat-tiġieġ, imqattgħin għat-tul fi ħxuna ta’ madwar 1 ċm
  • 100 g frak tal-ħobż imnixxef
  • 2 bajdiet, imħabbtin ħafif
  • 100 g dqiq
  • 2 mgħaref ġunġlien
  • Mgħarfa kosbor jew tursin frisk, imqatta rqiq’
  • 2 sinniet tewm, misħuqin
  • Kuċċarina soy sauce
  • Melħ u bżar mitħun frisk
  • Żejt veġetali, biex taqli

 

Tħejjija:

  1. Ħallat il-frak tal-ħobż u l-ġunglien fi platt. Fi skutella baxxa ħabbat flimkien il-bajd, is-soy sauce, it-tewm u l-kosbor jew tursin. Fuq platt ieħor poġġi d-dqiq u ħallat miegħu ftit melħ u bżar.
  2. Dawwar il-biċċiet tat-tiġieġ waħda waħda fid-dqiq u farfar iż-żejjed. Billhom fit-taħlita tal-bajd, imbagħad dawwarhom kompletament fil-frak tal-ħobż. Agħfas ftit fuqhom biex il-panura teħel sew u poġġihom fuq platt kbir.
  3. Saħħan għoli ta’ 1 ċm żejt f’taġen kbir fuq nar moderat. Aqli l-biċċiet tat-tiġieġ minn kull naħa sakemm jiħmaru u jsiru sew minn ġewwa, imbagħad poġġihom fuq platt miksi bil-karti tal-kċina biex joqtru miż-żejt.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.