Riċetta: Tiġieġ bit-tuffieħ u turmeric

Riċetta: Tiġieġ bit-tuffieħ u ż-żagħfran (saffron) tal-Indja, recipe of chicken with apples and saffron

Ħafna minnkom tgħiduli li ma tħobbux tużaw il-frott mal-ikla ewlenija, u ftit minnkom bdejtu tużawh u qiegħed jogħġobkom. Dan tridu tagħmluh bil-moderazzjoni, tesaġerawx u jogħġobkom żgur, speċjalment jekk tużaw it-tuffieħ li jiena ngħajjatlu "ta' Malta" u meta nikteb bl-Ingliż insejjaħlu wild apples. Dan rajt ħafna minnkom ma tużawhx għax fid-dehra mhux perfett imma ma nistax ngħidilkom kemm hi tajba t-togħma: daqsxejn qarsa u ma' dixxijiet tal-ikla ewlenija r-riżultat ikun delizjuż. 

Ingredjenti:

3 tuffiħat żgħar, imqaxxrin u mqattgħin wedges
3 mgħaref żejt
basla mqaxxra u mqattgħa slices
450 g tiġieġ, uża sider jew koxxa mingħajr għadma
niskata melħ
ftit bżar iswed
niskata żagħfran tal-Indja (turmeric)
kuċċarina kunserva
nofs mgħarfa Stevia, jew jekk tridu użaw zokkor
3 mgħaref apple cider vinegar
2 mgħaref favetta safra
werqa randa
ilma sħun

 

Tħejjija:

Għandek bżonn dixx tal-forn. Saħħan iż-żejt fuq nar moderat. Aqli t-tuffieħ miż-żewġ naħat. Neħħi mit-taġen u poġġi fil-qiegħ tad-dixx. Fl-istess taġen aqli l-basla u ħawwad għal żewġ minuti. Żid il-laħam tat-tiġieġ u sajru minn barra.  Żid il-melħ, il-bżar u ż-żagħfran.  Ħawwad. Neħħi minn fuq in-nar u poġġi t-taħlita mat-tuffieħ.  Ħallat l-istevia mal-kunserva u żid nofs kikkra ilma jaħraq.  Ferragħ fuq it-taħlita tal-laħam.  Żid il-favetta, ir-randa u kikkra ilma sħun oħra mħallta bil-ħall.  Għatti d-dixx bil-fidda (foil) u  sajjar fil-forn fuq l-ixkaffa tan-nofs 175C għal siegħa.