Din it-taħwira kkulurita tista’ tużaha ma’ ħafna affarijiet, bi ftit immaġinazzjoni – fuq berges, bejn il-ħobż ma’ laħam jew tiġieġ, fir-wraps – imma l-aktar li tinżel tajjeb huwa żgur mal-hotdogs.
Ingredjenti
Għal madwar 1lt
- 3 imżiewet qamħirrun
- 2/3 ta’ kikkra ħall tas-sidru
- 1/3 ta’ kikkra ilma
- 1/3 ta’ kikkra zokkor ismar
- 1 mgħarfa żerriegħa tal-mustarda
- 2 kuċċarini żerriegħa tal-kemmun
- ½ kuċċarina żerriegħa tal-karfus
- ½ kuċċarina melħ oħxon
- ½ kikkra basal aħmar, imqatta’ rqiq
- 2 sinniet tewm, imqatta’
- 1 bżaru aħmar (capsicum), imqatta’ rqiq
- 1 bżaru aħdar (capsicum), imqatta’ rqiq
- 1 bżaru aħmar/aħdar milli jaħraq, imqatta’ rqiq
- Imla borma kbira bl-ilma, poġġiha fuq in-nar sakemm l-ilma jiftaħ jagħli, imbagħad żid il-qamħirrun, għalli għal 3 minuti, tella’ l-qamħirrun mill-misħun u poġġih b’bieqja bl-ilma kiesaħ. Meta jibda jibred, ixxuttah ftit u aqla’ s-snien tal-qamħirrun b’sikkina.
- F’kazzola mdaqqsa ħallat il-ħall; l-ilma; iz-zokkor; il-melħ; u ż-żrieragħ tal-mustarda, tal-kemmun u tal-karfus. Poġġihom fuq in-nar sakemm it-taħlita tibda tagħli. Ħawwad sakemm jinħall iz-zokkor, imbagħad itfa’ l-basal. Baxxi n-nar u tektek għal 5 minuti.
- Żid il-bżar (capsicum), it-tewm u l-bżaru jaħraq u tektek għal 5 minuti oħra. Żid il-qamħirrun u kompli tektek għal minuta. Neħħi l-kazzola minn fuq in-nar u poġġi t-taħlita f’vażetti sterilizzati ta’ 500ml u ssiġillahom. Ħalli l-vażetti jiksħu qabel tpoġġihom fil-friġġ.
Nota: biex tisterilizza l-vażetti għallihom fl-ilma għal 10 minuti b’sarvetta fil-qiegħ tal-borma biex ma jħabbtux. Tellagħhom mill-ilma bil-mod, battalhom mill-ilma u ħallihom jinxfu fuq xugaman.
