Riċetta: ‘Tacos’ bis-Salamun u ‘Pico de Gallo’ (tip t’insalata Messikana) tal-għeneb

By Jess Lander (http://flickr.com/photos/pancakejess/1175858267/) [CC-BY-2.0 (http://creativecommons.org/licenses/by/2.0)], via Wikimedia Commons

Fil-kċina Messikana, il-pico de gallo, li tfisser il-'munqar tas-serduq' bl-Ispanjol, u li hi magħrufa wkoll bħala salsa fresca (zalza friksa), hija tip t'insalata li tintuża b'mod simli ħafna ta' kif tintuża s-salsa, iz-zalza tradizzjonali Messikana, iżda iktar niexfa.

L-insalata pico de gallo ġeneralment tkun magħmula mit-tadam imqatta', basal imqatta', bżar aħmar imqatta' u kosbor (coriander) imqatta' bi ftit bżar u melħ u meraq tal-lime. Ħafna drabi jidħlu wkoll ingredjenti bħall-gambli, zalzett, qarnit, avokado, ħjar u affarijiet oħra. Iżda f'din ir-riċetta, il-pico de gallo daqsxejn mhux tas-soltu għaliex il-bażi tal-insalata huwa l-għeneb flok it-tadam. 

Ipprova r-riċetta għal Tacos bis-Salamun u Pico de Gallo tal-għeneb għal platt Messikan b'togħma kemmxejn Mediterranja.

Isservi: 4 persuni

 

Ingredjenti:

  • 12 torillas żgħar tal-qamħirrun
  • Nofs kilo flett tas-salamun
  • Kikkra għeneb aħmar mingħajr żrieragħ, mqatta'
  • Kikkra għeneb aħdar mingħajr żrieragħ, mqatta'
  • 1/4 kikkra basal abjad imqatta'
  • 1/2 jalapeno pepper, neħħi ż-żrieragħ u qatta'
  • Ftit bżar u melħ skont il-gosti
  • Żejt taż-żebbuġa skont il-gosti
  • 2 lime, fi flielel

Tħejjija:

  1. Lesti l-grill għax-xiwi fuq nar medju.
  2. Poġġi l-għeneb, il-basal u l-jalapeno ġo skutella medja, raxxax ftit bżar u melħ u ħawwad biex tagħmel il-pico de gallo. Għatti u kessaħ fil-friġġ sakemm tlesti s-salamun.
  3. Idlek is-salamun bi ftit żejt fuq kull naħa u raxxax ftit bżar u melħ. Igrilljah għal 4-5 minuti fuq kull naħa jew sakemm isir kif togħġbok. Neħħi min-nar u warrab; żommu għas-sħana.
  4. Saħħan it-tortillas fuq il-grill.
  5. Qatta' s-salamun f'biċċiet u aqsmu bejn it-tortillas. Agħmel daqs imgħarfa pico de gallo ġo kull taco u servi bil-flielel tal-lajm.

 

Informazzjoni tan-nutrizzjoni (għal 3 tacos): 347 kalorija