Tista' tipprova din ir-riċetta għal tacos bil-qargħa ħamra, tadam u fażola. It-taħlita tal-qargħa u t-tadam weħidhom jagħmlu mili ferm tajjeb imma l-fażola iżżid is-sustanza. Tista' tuża diversi tipi ta' fażola, kemm tal-bott jew mgħollijin. Għal din ir-riċetta tista' tipprova tuża l-fażola borlotti. Il-ġobon tal-mogħoż jagħmel konsistenza kremuża.
Ħin: 30 minuta
Isservi: 6 persuni
Ingredjenti:
- 2 imgħaref żejt taż-żebbuġa Carapelli
- Basla zgħira, mqatta'
- Melħ skont il-gosti
- 2 tewmiet, maħkukin
- 350g tadam, imqaxxar u mqatta' (biex tara kif tista' tqaxxar it-tadam, ikklikkja hawn)
- 700g qargħa ħamra, mqatta' kwadri zgħar (madwar 4 kikkri u nofs)
- Felfel (bżaru aħmar)
- Kikkra u nofs fażola skont il-gosti tiegħek
- 1/4 kikkra cilantro (tip ta' tursin) mqatta'
- 12-il tortilla tal-qamħirrun, imsaħħnin
- 50g ġobon tal-mogħoż imfarrak (madwar nofs kikkra)
- Salsa tad-tadam skont il-gosti tiegħek (biex tara riċetta għas-salsa Ranchera ikklikkja hawn)
Tħejjija:
- Saħħan iż-żejt taż-żebbuġa ġo taġen kbir fuq nar medju.
- Żid il-basla mqatta'. Sajjar għal madwar 5 minuti, sakemm jirtab. Dejjem ibqa' ħawwad.
- Żid ftit melħ u tewm. Sajjar għal madwar 30 sekonda, sakemm it-tewm jibda jfuħ. Dejjem ibqa' ħawwad.
- Żid it-tadam. Sajjar għal madwar 10 minuti, sakemm it-tadam jinxef ftit. Dejjem ibqa' ħawwad.
- Żid il-qargħa, il-felfel u iktar melħ għat-togħma. Sajjar għal madwar 8 minuti, sakemm il-qargħa tirtab imma mhux tinħall. Dejjem ibqa' ħawwad.
- Żid il-fażola u s-cilantro u saħħanhom.
- Saħħan it-tortillas u imlihom bit-taħlita u bil-ġobon imfarrak. Servi bis-salsa.
Jekk tixtieq, tista' tlesti l-mili minn ġurnata qabel u ħallih fil-friġġ, imbagħad kemm issaħħnu ġo taġen.
Informazzjoni tan-nutrizzjoni għal 2 tacos:
281 kalorija
