Read this recipe in English: Indian potato and chickpea curry
Platt veġetarjan straordinarju mħawwar b’diversi ħwawar li jagħtu togħmiet differenti. Il-jogurt ftit qares jikkumplimenta l-platt u tista’ servi dan l-istuffat fuq sodda tar-ross ukoll.
Ħin totali: siegħa u 20 minuta
Isservi: 6 persuni
Ingredjenti:
- 1 mgħarfa żejt taż-żebbuġa extra verġni
- 3 basliet kbar, imqattgħin oħxon
- 4 sinniet tewm, imqattgħin
- 1 kuċċarina żerriegħa tal-kemmun (cumin seed)
- 1 kuċċarina kemmun mitħun (ground cumin)
- 1 kuċċarina kożbor mitħun (ground coriander)
- ½ kuċċarina trab tal-kannella (cinnamon)
- ⅛ kuċċarina bżar cayenne
- 500 g patata, maħsula sew u maqsuma f’erbgħa
- 1 ½ kikkra ilma
- ½ kuċċarina melħ
- 500 g ċiċri tal-bott, imsaffija u mlaħalħa
- 400 g polpa tat-tadam
- 500 g karrotti, imqattgħin roti
- ½ kikkra nagħniegħ frisk, imqatta’
- ¾ kikkra jogurt naturali
Tħejjija:
- Saħħan iż-żejt taż-żebbuġa f’taġen kbir bil-ġnub għoljin.
- Żid il-basal u qalli għal madwar 5-6 minuti jew sakemm jibda jiħmar.
- Żid it-tewm u kompli qalli għal minuta oħra.
- Żid iż-żerriegħa tal-kemmun, il-kemmun mitħun, il-kożbor, it-trab tal-kannella u l-bżar cayenne u ħawwad għal minuta.
- Żid il-patata, il-karrotti, l-ilma u l-melħ. Għatti t-taġen u tektek għal 10 minuti.
- Żid iċ-ċiċri u t-tadam u ħawwad.
- Ħalli t-taħlita terġa’ tiftaħ tagħli u tektek, mgħotti parzjalment, għal madwar 30 minuta jew sakemm il-karrotti jirtabu. Jekk ikun hemm bżonn, waqt it-tisjir żid aktar ilma.
- Roxx in-nagħniegħ, ħawwad u servi bil-jogurt.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.
