Meta kont żgħira niftakar qiegħ il-baħar b’ammont sostanzjali ta’ rizzi, li n-nies kienu jtellgħu fil-basktijiet tax-xibka. Kultant fuq il-blat kont issib il-qxur kollha xewk tiegħu u ma trid xejn biex iddaħħal xi xewka f’qiegħ sieqek! Illum il-bajd (ġewwieni) tar-rizzi ssib tixtrih faċilment mingħand il-ħwienet li jbigħu l-ħut.
Ħin: 30 minuta
Isservi: 4 persuni
Ingredjenti:
- 400 g spagetti
- 100 g bajd tar-rizzi
- 2 sinniet tewm, misħuqin
- 4 tadamiet, imqaxxrin u mqattgħin irqiq
- 100 ml żejt taż-żebbuġa
- Melħ u bżar mitħun frisk
- 2 imgħaref tursin frisk, imqatta’
Tħejjija:
- Għalli l-ispagetti f’borma kbira ilma bil-melħ sakemm isir al dente.
- Sadanittant saħħan iż-żejt f’taġen kbir fuq nar moderat.
- Żid it-tewm u ħawwad għal ftit sekondi mingħajr ma tħalli t-tewm jieħu l-kulur, imbagħad żid ir-rizzi u t-tadam.
- Ħalli t-taħlita tagħli, għaffeġ ftit b’furketta t-tadam biex jinħall u baxxi n-nar.
- Saffi l-għaġin u itfgħu fit-taġen maz-zalza. Żid melħ u bżar kem tiggosta u ħawwad għal minuta fuq nar bati.
- Servi fil-pront bit-tursin imferrex fuq l-ispagetti.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
