L-ispagetti huwa wieħed mill-forom tal-għaġin l-aktar popolari, u sikwiet jisserva maz-zalza tal-laħam magħrufa bħala Bolognese. Din ir-riċetta tixbah ħafna lil din, bid-differenza li minflok laħam fiha għads aħmar (fil-fatt għandu kulur oranġjo). B’hekk huwa platt addattat ukoll għal min ma jikolx laħam.
Preparazzjoni: 15-il minuta
Ħin totali: 55 minuta
Isservi: 6 persuni
Ingredjenti:
- Mgħarfa żejt taż-żebbuġa
- Basla, imqattgħa rqiq
- 2 zkuk tal-karfus, imqattgħin irqiq
- 2 karrottiet, maħkukin oħxon
- 2 sinniet tewm, misħuqin
- 115 g għads aħmar
- 400 g polpa tat-tadam
- 2 imgħaref kunserva
- 500 ml stokk tat-tiġieġ (jew stokk tal-ħaxix)
- 500 g għaġin spagetti
- Melħ u bżar mitħun frisk
- 100 g ġobon Parmiġġan, maħkuk
Tħejjija:
- Saħħan iż-żejt f’taġen fuq nar moderat.
- Żid il-basla, il-karfus il-karrotti u t-tewm u qalli għal 5 minuti sakemm jirtab il-ħaxix.
- Żid l-għads, il-polpa tat-tadam, il-kunserva u melħ u bżar.
- Għolli n-nar sakemm jagħli, imbagħad erġa’ baxxih u tektek għal 30 minuta mgħotti parzjalment, sakemm iz-zalza tinġibed.
- Sadanittant, għalli l-ispagetti f’borma kbira ilma bil-melħ sakemm isir al dente. Saffih u erġa’ rritornah fil-borma.
- Ferra’ z-zalza fuq l-ispagetti u ħallathom flimkien sew. Servi fil-pront bil-ġobon Parmiġġan imferrex fil-wiċċ.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
