Dan il-platt dejjem ifakkarni fil-kanzunetta tat-tfal On top of spaghetti miktuba u kantata minn Tom Glazer fl-1963. Din il-kanzunetta ħelwa tirrakkonta x’għadda minnu ballun tal-laħam meta xi ħadd għatas u tajru minn fuq il-platt tal-ispagetti. Għalkemm il-laħam użat f’din ir-riċetta huwa l-ħaruf, tista’ tuża laħam ieħor bħal ċanga, majjal u anke kkapuljat tal-fenek.
Ingredjenti
Għal 4 persuni
Għall-blalen tal-laħam
• ½ basla, imqattgħa rqiq ħafna
• 2 sinniet tewm, imqatta’ rqiq
• ½ kilo kkapuljat tal-ħaruf
• 1 bajda
• 1 mgħarfa ħxejjex aromatiċi mħalltin, imnixxfin
• 1 mgħarfa żejt taż-żebbuġa
• Niskata melħ
• Bżar mitħun frisk
Għaz-zalza
• 400g passata tat-tadam
• 50ml inbid aħmar
• 2 mgħaref ħabaq frisk, imqatta’
• 2 sinniet tewm, imqatta’ rqiq
• Niskata melħ
• Bżar mitħun frisk
Għall-ispagetti
• 400g spagetti
• Ġobon Parmiġġan, maħkuk
Ibda billi tipprepara l-blalen tal-laħam. Ħallat flimkien l-ikkapuljat tal-ħaruf, il-basla, it-tewm, il-ħxejjex aromatiċi, il-melħ u l-bżar, u l-bajda. Ifforma t-taħlita f’20 ballun, poġġihom fuq tilar, għattihom, u daħħalhom fil-friġġ għal mill-inqas 30 minuta.
Saħħħan iż-żejt f’taġen kbir u aqli l-blalen għal madwar 10 minuti filwaqt li ddawarhom kultant biex isiru mid-dawra kollha.
Żid l-inbid, il-passata tat-tadam, it-tewm u l-ħabaq. Ħalli kollox jiftaħ jagħli, baxxi n-nar u tektek bit-taġen parzjalment mgħotti għal 20 minuta.
Sadanittant, f’ħafna ilma bil-melħ, għalli l-ispagetti għall-gosti tiegħek. Saffih u qassmu bejn erba’ platti. Servi l-ispagetti biz-zalza u l-blalen tal-laħam fil-wiċċ.