Riċetta: Sorbet tal-bettieħ cantaloupe

Melon Sorbet

Il-bettiegħ bħalissa huwa fl-aqwa tiegħu, għalhekk naħtfu l-opportunità biex nużawh kemm nistgħu. Dan is-sorbet tista’ tagħmlu malajr jekk għandek xi bettieħa cantaloupe (mill-oranġjo), għax kulma jkollok bżonn aktar huma l-ilma u z-zokkor. Jekk għandek żewġ bettiħat żgħar tista’ taqsamhom min-nofs, tneħħilhom il-laħam biex tagħmel is-sorbet u terfa’ l-qxur biex isservi fihom minflok skutella. Poġġihom fil-friża biex jibbiesu u jżommu l-forma.

Ħin: 15-il minuta, u ħin biex tiffriża

Isservi: 4 persuni

Ingredjenti:

  • 600 g bettieħ, imqaxxar u mqatta’
  • 150 ml ilma
  • 150 g zokkor

Tħejjija:

  1. Poġġi l-ilma u z-zokkor f’kazzola fuq nar moderat u ħawwad sakemm jinħall iz-zokkor.
  2. Poġġi ¾ mill-bettieħ fi blender max-xropp u itħan kollox. Qatta’ l-kumplament tal-bettieħ f’biċċiet żgħar ħafna u poġġih f’reċipjent tal-friża. Ferra’ fuqu t-taħlita mitħuna u ħawwad ftit. Għatti r-reċipjent u ffriża għal 3 sigħat. Oħroġ u ħawwad is-sorbet b’mgħarfa  kull 45 minuta jew siegħa waqt li jkun qed jiffriża biex ma jibbiesx ħafna.
  3. Servi fil-qxur u żejjen bil-weraq tan-nagħniegħ frisk.

Ippruvajtha din ir-ricetta ta' sorbet tal-bettieħ cantaloupe? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know by commenting below and we'll have it translated for you!