Riċetta: Soppa tat-traħana biż-żejt taż-żebbuġa u lumi

Recipe Simple trahana soup with lemon and olive oil

It-traħana hija prodott li jittiekel fil-Greċja u l-Lvant tal-Mediterran, magħmul mill-qamħ bulgur, semolina, jew taħlita ta’ semolina u dqiq, miżjud il-ħalib għal traħana ħelwa, jew ħalib u jogurt għal traħana b’togħma aktar qarsa. Biex tagħmel it-traħana d-dar segwi din ir-riċetta, imbagħad kompli fuq din ir-riċetta tas-soppa tat-traħana biż-żejt taż-żebbuġa u lumi. Soppa li timliek imma hija friska fl-istess ħin.

Ħin: 25-30 minuta

Ingredjenti

Għal 6 persuni

  • 3 mgħaref żejt taż-żebbuġa ekstra verġni
  • 1½ kikkra traħana mill-qarsa
  • 8 kikkri ilma, jew stokk tal-ħaxix jew tat-tiġieġ
  • Melħ u bżar mitħun frisk
  • 3 mgħaref meraq tal-lumi, mgħoddi minn passatur
  • 6 mgħaref ġobon feta, imfarrak
  • Jogurt Grieg biex iżżejjen, jekk trid
  • Ħxejjex aromatiċi friski mqattgħin, biex iżżejjen

 

  1. F’borma mezzana saħħan 2 mgħaref żejt taż-żebbuġa fuq nar medju.
  2. Żid it-traħana u ħawwad għal minuta sakemm tinkesa kollha biż-żejt. Żid l-istokk jew l-ilma. Għolli n-nar sakemm jibda jagħli.
  3. Żid il-melħ u l-bżar, baxxi n-nar u tektek għal 15-20 minuta sakemm it-taħlita tibda tagħqad ftit. (Jekk qed tuża traħana tal-bulgur magħmula d-dar dan il-proċess jieħu 15-20 minut; jekk qed tuża traħana magħmula mis-semolina jew dqiq il-ħin biex issir ikun ta’ 8-12-il minuta u r-riżultat tas-soppa jkun aktar magħqud.)
  4. Neħħi l-borma minn fuq in-nar, żid il-meraq tal-lumi u ħawwad. Aqleb fil-bwieqi li se sservi fihom u fil-wiċċ ferrex ftit żejt taż-żebbuġa u l-ġobon feta. Jekk trid żejjen bil-jogurt Grieg u ħxejjex aromatiċi bħal nagħniegħ, tursin u xibt.

Jekk se tuża traħana tal-qamħ bulgur, tista’ tagħmel din is-soppa sa tlett ijiem qabel tużaha u żżommha fil-friġġ.