Din is-soppa ideali biex tuża dak il-laħam li jibqagħlek meta tagħmel tiġieġa l-forn. Għax ikun diġà msajjar, inħobb inqatta', inneħħi l-għadam mil-laħam li jibqa' tat-tiġieġa u nqattagħha biċċiet żgħar. Dawn inżidhom fl-aħħar naqra tat-tisjir għax jekk issajru wisq il-laħam ma jibqax b'konsistenza tajba.

Laħam tat-tiġieġ, dak li jifdallek
2 litri stokk tat-tiġieġ
2 flieli ġinġer frisk mitħun
4 mgħaref meraq tal-lumi frisk
50 g faqqiegħ, imqatta' flieli rqaq
75 g qamħ isfar tal-friża
4 mgħaref soy sauce
2 mgħaref fish sauce
Sinna tewm maħkuka
Basla mqattgħa rqiqa
Mgħarfa żejt
Kosbor frisk, ftit weraq biex iżżejjen

Qalli ħafif il-basla. Żid it-tewm u l-flieli tal-ġinġer, u wara l-istokk tat-tiġieġ. Itfa' l-faqqiegħ, il-qamħ isfar u sajjar għal 5 minuti.  Żid is-soy sauce, il-fish sauce u l-meraq tal-lumi. Itfa' t-tiġieġ, imqattgħa biċċiet żgħar u sajjar fuq nar baxx għal ħames minuti. Aqleb ġol-platti tas-soppa. Żejjen bil-kosbor frisk fil wiċċ. Din is-soppa għandha tittiekel mill-ewwel u ma terġax tiġi msaħħna minħabba jekk qiegħda tuża tiġieġ li jkun baqa' mit-tisjira ta' ikla oħra.

 
Ippruvajt din ir-riċetta?  Kif sibtha? Għidilna billi tħalli kumment hawn taħt.