Riċetta: Soppa tal-ħaxix u x-xgħir

Riċetta Soppa tal-ħaxix u x-xgħir

Għal min iħobb jixtri l-ħaxix fl-istaġun tiegħu u meta jkun irħis, is-sopop huma mod kif tuża u tgawdi dan il-ħaxix. Kważi s-sopop kollha li fihom il-ħaxix għandhom l-istess bażi u għalhekk tista’ tibda b’din il-bażi u żżid il-ħaxix tal-istaġun jew taħlita ta’ aktar minn wieħed. Mas-sopop tista’ żżid ukoll legumi differenti li jgħaqqdu aktar lis-soppa.

Ingredjenti

Għal 6 persuni

  • 2 mgħaref żejt taż-żebbuġa
  • 1 kikkra basal, imqatta’
  • 1 kikkra zunnarija, imqattgħa
  • 350g faqqiegħ frisk, imqatta’
  • ½ kikkra xgħir (barley)
  • 6 kikkri brodu taċ-ċanga, tiġieġ jew ħaxix
  • ½ kuċċarina melħ oħxon
  • 2-3 kikkri spinaċi

Saħħan iż-żejt ġo borma kbira u qalli l-basal u z-zunnarija sakemm jibdew jirtabu.

Żid il-faqqiegħ u sajjar għal 2 minuti oħra. Żid ix-xgħir, il-brodu u l-melħ.

 Meta l-borma tiftaħ tagħli, baxxi n-nar u kompli tektek għal 40-60 minuta.

 Żid l-ispinaċi u kompli sajjar għal 5 minuti oħra.