Is-soppa bnina dejjem, u tant hemm varjazzjonijiet ta’ sopop bi ħxejjex u ingredjenti differenti li t-togħmiet qatt ma jkunu l-istess. Bħalma dejjem ngħid, għandna naħtfu l-okkażjoni tal-ħxejjex li jkunu fl-istaġun u noħolqu riċetti bihom.
Ħin: siegħa
Isservi: 4 persuni
Ingredjenti:
- Basla, imqattgħa
- 2 zkuk tal-karfus, imqattgħin
- 25 g butir
- 2 imgħaref ross
- Fergħa tas-sagħtar frisk
- 1.3 kg imżiewet tal-ful (350 g imqaxxar)
- 1 l stokk tat-tiġieġ jew ħaxix
- 100 g piżelli mqaxxra friska, jew tal-friża
- Melħ u bżar mitħun frisk
- 8 imgħaref jogurt Grieg
- 2 imgħaref nagħniegħ frisk, imqatta’
Tħejjija:
- Dewweb il-butir f’kazzola u qalli l-basla għal 5 minuti sakem tirtab.
- Żid ir-ross u ħawwad biex jinkesa kompletament.
- Żid il-fergħa tas-sagħtar u l-ful u ħawwad għal minuta, imbagħad ferra’ l-istokk u żid ftit melħ u bżar.
- Għolli n-nar sakemm tiftaħ tagħli, imbagħad erġa’ baxxih u tektek għal 10 minuti.
- Żid il-piżelli u kompli tektek għal 5 minuti oħra.
- Tellgħa l-fergħa tas-sagħtar u itħan is-soppa sakemm ikollok taħlita lixxa.
- Erġa’ saħħan is-soppa fuq nar baxx u żid nofs il-jogurt Grieg u n-nagħniegħ.
- Aqleb fi platti fondi u servi b’mgħarfa jogurt imħawda fil-wiċċ tas-soppa.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Ara lista ta' ħxejjex u frott skont l-istaġun
Would you like to read this recipe in English? Let us know in the comments section below!
